Kalainan nilang Roel ug Ronnel

Sa mga mata sa balaod, way kalainan silang Ronnel Baguio ug Roel Degamo. Bisan kon estudyante ra sa University of Cebu (UC) si Baguio ug bisan gobernador sa Negros Oriental si Degamo, ang balaod buta sa managlahi nilang luna sa katilingban. Ang balaod naghatag nila

og managsamang mga katungod ug naningil nila og managsamang mga obligasyon.

Pero ang kamakiangayon sa balaod kutob ra sa papel. Sa aktuwal nga pagpatuman ini, mas dako ang kahigayonan nga kapanalipdan ang mga katungod ni Degamo ug mas dako ang risgo nga mayatakan si Baguio.

Dihang gipataktak si Degamo sa puwesto sa duha ka higayon, dihang gisuspenso og tulo ka buwan, ug dihang napilde sa unang hugna sa proklamasyon sa eleksiyon pagka gobernador, gipanalipdan si Degamo sa banggitang mga abogado. Wa siya mataktak, ang pagkasuspenso nakahatag hinuon niya og lab-as nga tulo ka termino ug naproklamar nga tinuod nga gobernador.

Dihang gitabangan og bunal si Baguio sa mga sakop sa Tau Gamma Phi fraternity, apil nang iyang magtutudlo sa UC, way nagtagad pagsagang sa pagpangulata. Uwahi nang nahatod sa ospital maong wa na matabang.

Duha ka adlaw human sa kamatayon ni Degamo, gipahibawo ni PNP Chief Rodolfo Azurin Jr. nga nakiha nang mga dinakpan sa ilegal nga paghupot sa mga armas ug eksplosibo ug sa Lunes mapasaka nang mga kasong pagpatay ug pagsuway pagpatay sa mga responsable sa pagkamatay sa siyam ug pagkasamad sa laing 14 ka biktima.

77 ka adlaw na human sa kamatayon ni Baguio niadtong Disyembre 19, wa pay bisan usa nga nadakpan ug wa pay bisan usa nga nakiha sa mga nidagmal niya. Nagkarakara na lang ang kapolisan sa pag-andam sa mga kaso kay nabisto ang hazing sa kaulohan.

Labing dagkong opisyal sa gobyerno nikondenar sa pagpatay ni Degamo ug nipasalig nga masilotan utok sa krimen. Nga angay lang. Kay way luna sa demokratikanhong nasud ang bangis nga krimen nga mapasagdan.

Pero way usa nilang nituki sa gidangatan ni Baguio. Ambot may nakahigayon ba paglili sa nagbangotan sab niyang pamilya sa Mariveles, Bulacan. Samang way nagsusi kon nahatagan na ba og hustisya ang kapin sa 30,000 nga laktod nga giluba sa kampanya sa drugas.