Paboritong iglalawog sa tirong
Wa pay usa ka tuig ang administrasyon ni Presidente Ferdinand Marcos Jr. pero duha na ka administrador sa Sugar Regulatory Administration (SRA) ang natangtang sa puwesto. Ang kontrobersiyal nga resignasyon sa Bisaya nga si Hermenegildo Serafica sa Agosto sa niaging tuig gisundan sa misteryuso nga pag-resign sa puli niya nga laing Bisaya nga si David John Thaddeus Alba karong semanaha.
Managsama silang nahilambigit sa gikuwestiyon nga mga importasyon sa asukar. Si Serafica gipasanginlang nipalusot sa Sugar Order No. 4 samtang si Alba gituohang nalutsan sa Sugar Order No. 6.
Si Serafica nanalipod sa iyang kaugalingon gikan sa pasangil sa Malacañang nga nagbuut-buot sila pagtugot sa importasyon sa 300,000 metric tons sa asukar. Matod ni Serafica igo lang silang nagtuman sa sugo sa presidente.
Gibisto pa ganing Serafica nga ang presidente maoy niapura sa pag-import og 600,000 metric tons sa asukar. Matod ni Serafica siyay nisugyot nga katunga lay komprahon aron di maapiki ang lokal nga industriya sa asukar. Napamatud-an nga sakto silang Serafica ug kaubanan. Pero wa mabalik si Serafica sa puwesto kay natudlo na si Alba.
Sa iyang bahin, si Alba puwerteng hiloma. Wa siyay tingog sa pagbisto ni Senador Risa Hontiveros sa Malacañang-sponsored sugar smuggling: Nidunggo nang 260 ka containers sa imported sugar gikan sa Thailand bisan wa pa nila mapirmahi ug mapublikar ang Sugar Order No. 6.
Wa sab siyay tingog dihang gipasanginlan ni Hontiveros silang Agriculture Undersecretary Domingo Panganiban, Executive Secretary Lucas Bersamin, ug Presidente Marcos nga nilaktaw sa SRA nga maoy ray dunay gahom sa pagsugo sa importasyon sa asukar.
Sa mga hunungihong nga si Alba ang gisakripisyo aron paglipat sa atensiyon sa publiko gikan sa kapin na sa buwan nga exposé ni Hontiveros pero wa pa matarung sa pagtubag sa presidente ug sa iyang mga sinaligan, gidalidali pagpahibawo sa Malacañang nga ni-resign si Alba tungod sa nagkagrabe niyang high blood pressure.
Napamatud-an sa pagkatangtang nilang Alba ug Serafica nga ang SRA usa sa labing peligrusong ahensiya. Taliwa sa acting Agriculture secretary nga way nahimo pagsulbad sa mga eskandalo ug sa mga timaan sa pagtukod og bag-ong sugar cartel, ang administrador maoy paboritong iglalawog sa tirong.