Kinsay mangahas og imbestigar
Labihang hiloma sa mga kongresista sa transaksiyon sa media network ni House Speaker Martin Romualdez ug ABS-CBN. Way nihangop. Wa say nitiyabaw. Lahi sa kasaba sa pipila nila pagbatok sa aplikasyon sa franchise renewal sa ABS-CBN tulo ka tuig ang nilabay. Lahi sab sa ilang hudlat pagkandado sab sa TV5 ni Manny Pangilinan kon dayunon ang ₱2 bilyones nga investment deal uban sa ABS-CBN.
Gikastigo nila ang ABS-CBN ug TV5 bisan kon way napakita nga kalapasan sa balaod. Tak-om sila sa transaksiyon ni Romualdez nga klarong niyatak sa mga lagda.
Klaro ang balaod. Di mahimong moapil ang opisyal sa gobyerno og negosyo nga nagkinahanglan og pagtugot gikan sa upisina nga iyang gihuptan. Si Romualdez maoy pangu sa House of Representatives. Nga dunay gahom paghatag og prangkisa sa iyang Philippine Collective Media Corp. (PCMC). Kabahin sa iyang Prime Media Holdings Inc. nga maoy kasabot sa ABS-CBN. Gipawong sa mga kongresista ang ABS-CBN bisan sa pasalig sa Bureau of Internal Revenue ug Securities and Exchange Commission nga way nahimong kalapasan. Gipasagdan nilang mga kompaniya ni Romualdez nga mahimong sang nganlan og Pahimus Inc.
Nilingiw ang mga kongresista bisan kon si Romualdez wa motago sa paggamit sa iyang dakong puwesto sa House aron pagpalambo sa pribado niyang negosyo.
Si Romualdez ang majority leader niadtong 2020 dihang giusab sa House ang prangkisa sa PCMC, nga para ra unta sa iyang TV ug radio stations sa Tacloban City ug Eastern Visayas, ug gipalapdan aron nga makasibya na sa tibuok nasud. Dungan sa gikatahong pagkaumol sa iyang ambisyon pagdagan og nasudnong posisyon.
Ni-divest ba si Romualdez sa iyang mga interes sa iyang media network nga gawas sa TV ug radio stations sa nagkalainlaing probinsiya naglakip na sab sa nasudnong newspapers ug tabloids?
Ang conflict of interest hingpit niyang gisalida. Sa bukas nga pagtambong sa mga inugurasyon ug ubang importanteng kalihokan sa iyang mga kompaniya. Nganong nabantang sa publiko nga wa siya modistansiya sa iyang TV ug radio stations? Kay kumpleto ang mga detalye sa kalihokan nga iyang gitambongan. Gawas sa sinuwat nga press release ug mga letrato, dunay audio ug video coverage. Nga gi-post sa iyang, nakatag-an ka, national newspapers.