Puhalay sa Sinulog
Gikan sa palabwanay sa venue sa Sinulog sa niaging tuig ngadto sa puhalay sa premyo karong tuiga. Unsa may atong mapaabot sa sunod tuig? Indigay sa mga insentibo pagdani sa dugang lokal ug out-of-town contingents? Pabonggahay sa costume, duyog, ug choreography? Padaghanay sa magtapok nga mga politiko?
Ang kapiyestahan ni Sr. Sto. Niño ang gihimong
pantalya sa mga politiko. Pero ilang garbo ang gipalabi. Ginamit ang ilang puwesto ug ang buhis sa mga Sugbuanon. Bantay lang ni sila sa Balaanong Bata. Nga wa igdungog nga mangiyugpos lang atubangan sa pagpangabuso.
* * *
Asa man kuhaa sa kadagkoan sa Cebu City Hall ug Cebu Provincial Capitol ang minilyon ka pesos sa ilang gi-triple nga cash prizes para sa mananaog nga contingents? • Tipak ba ni sa ₱100 bilyones nga budget karong tuiga nga gipamugos ni Mayor Mike Rama nga kuhaon gikan sa gipamugos sab niyang pagpaburot sa buhis sa yuta?; o • Kabahin ba ni sa dakong ginansiya sa Kapitolyo sa pag-outsource sa mga doktor, nurse, ug ubang healthcare workers sa provincial hospitals nga mas naila sa pagbalibad kay sa pag-atiman sa mga pasyente? * * *
Nakugang ang kadagkoan sa Carmen sa amihanang Sugbo sa niaging tuig kay ilang Sinulog ang gidugokan sa contingents sa probinsiya nga ni-boykot
sa Grand Parade nga gipamugos ni Rama pagbalhin sa South Road Properties (SRP). Pero puwerteng lipaya nga bisan giuwan ang ilang Sinulog gipabahaan sa Kapitolyo og kuwarta nga doble sa naandang cash prizes sa Cebu City.
Ambot unsay gibati sa taga Carmen karon nga wa nay naghisgot sa ilang Sinulog sa sunod semana.
* * *
Human nipasalig si Sinulog executive director Jojo Labella nga 30 ka contingents ang moapil sa parada karong tuiga (23 taga Cebu City ug lima gikan sa gawas sa Sugbo), mas mingaw ang aktuwal nga mga numero sa Sinulog Foundation: 14 ray magtigi sa ritual showdown ug duha ray out-of-town contingents. Hinaot nga di mahugno ang mga manan-aw. Ilang makit-an karong Domingo ang replay sa Sinulog sa Kabataan sa Dakbayan niadtong Enero 13. Kalainan mao ang presensiya sa taga Dinagat Islands ug Negros Oriental ug mas apiking mga lingkoranan ug pasilonganan, ug peligrong mas mingaw gihapon, sa venue nga si Rama ray giganahan.