Liniwatay sa mga Duterte
Ambot tinuod bang mga huhungihong nga nahilom ang away sa kampo nilang Presidente Ferdinand Marcos Jr. ug House Speaker Martin Romualdez sa usa ka bahin ug sa kampo ni kanhi presidente Rodrigo Duterte sa pikas nga bahin kay:
• Wa tinud-a sa mga Duterte ang hulga sa pagbakwi sa mga heneral sa militar ug kapolisan sa ilang suporta sa administrasyon ug pagpahimutang ni Bise Presidente Sara
Duterte Carpio sa Malacañang; bugti sa
• Wa pagdayon sa administrasyong Marcos sa pasumbingay nga tabangan ang International Criminal Court (ICC) sa pagdakop sa kanhi presidente.
Pero sa wa pa makapahimutang og sukaranan ang pagtuo nga mahilot nang panagsungi ug mahibalik ang panaghiusa sa duha ka kampo, napahinumdoman ang tanang hingtungdan nga mahimong tinuod na ‘ning gubata tungod sa:
• Deklarasyon ni Kongresista Pulong Duterte nga di siya moluhod sa administrasyon bisan gilaslasan ang ₱2 bilyones nga budget sa iyang distrito ngadto na lang sa ₱500,000; ug
• Sumbalik sa kadagkoan sa House of Representatives nga ₱51 bilyones ang gibubo sa Duterte administration ngadto sa unang distrito sa Davao City gikan sa 2020 hangtod sa 2023.
Usa sa kinakusgan nga pangabaga ni Romualdez, si House Appropriations Committee Chairman Elizaldy Co, bisan niangkon nga wa pa kakita sa mga dokumento, nidason na sa makalilisang nga mga numero ug nihulagway sa Davao nga “holy land” kansang budget way nangahas sa pagtuki atol sa niaging administrasyon.
Bisan imbestigahon ug mapamatud-an sa House, di na mabawi ang dakong kuwarta. Pero mabali na ang lamesa. Imbes mangangkon nga biktima, mapugos na si Pulong paghatag og kuwentada sa iyang mga gasto.
Kon tinuod ang ₱51 bilyones ni Pulong sa niaging upat ka tuig, mapamatud-an sa mga Duterte nga tinuod sila nga nagliniwatay:
• Iyang amahan, si kanhi presidente nakasipong og ₱21 bilyones sa confidential ug intelligence funds sa 2017 hangtod sa 2022;
• Iyang manghod, si Bise Presidente Carpio, nakadawat og ₱650 milyones sa confidential funds sa 2023 human gihurot ang ₱125 milyones sud lang sa 11 ka adlaw sa Disyembre 2022; ug
• Lain niyang manghod, si Davao City Mayor Baste Duterte, nakasunod sa ₱2.97 bilyones sa confidential funds sukad sa 2016 hangtod karong tuiga.