Propaganda ni Romualdez
Ambot tungod ba kaha sa kadaghan niya og newspapers, radio, ug TV stations, nasobrahan rang presensiya sa media ni House Speaker Martin Romualdez: Hapit tanang tigom nga iyang gitambongan, hapit tanang diskurso nga iyang giluwatan, hapit tanang biyahe nga iyang gikuyogan, ug hapit tanang kamot nga iyang gilamano duna g’yuy
letrato ug dunay g’yuy press release.
Tingali aron pag-alkontra sa kasaysayan nga way speaker sa House of Representatives nga nakabanos sa Malacañang. O pagpahilom sa mga bugalbugal nga tungod sa iyang apelyido way kahigayonan nga makadaog pagka presidente sa 2028.
Tungod sa determinadong paningkamot nga magpabilin nga positibo ang media coverage, giseguro sa iyang media empire ang pagpahiyos o pagluok sa mga isyu batok niya:
• Gipasanginlan si Romualdez nga nakadawat og ₱3 bilyones nga suburno aron pag-impluwensiya sa korte sa pagpabor sa board members sa Okada Manila sa away pagkontrolar sa $3 bilyones nga casino resort; ug
• Gipasanginlan si Romualdez nga nidonar para sa Tagalog course sa Harvard University og hangtod $2 milyones (₱112 milyones) nga dakong tipak sa iyang gideklarar nga net worth nga ₱475 milyones niadtong 2016. * * *
Way estasyon o publikasyon nga gipanag-iya ni Romualdez ug sa iyang mga paryente ug mga higala ang nisubay sa mga detalye ug kalamboan sa isyu. Sama nga sa dihang gipasanginlan siya nga nagpabaha sa kuwarta pagpamalit sa mga pirma sa People’s Initiative (PI) pag-usab sa 1987 Constitution, iyang mga turutot naglumba pagdupa niya.
Pero nakapakita si Senador Imee Marcos sa hearing sa Senado sa letrato ni Romualdez uban sa mga tigpasiugda sa PI. Ug ang mga tigpasiugda nikumpisal nga nag-miting sila sa balay ni Romualdez.
* * *
Maong napugos si Romualdez pag-angkon sa iyang koneksiyon sa PI. Human niya gipanghimakak sa makadaghang higayon. Unsaon man paghaw-as sa gahong nga iyang nahulgan?
Modeklarar ang House karong Lunes sa hingpit nga suporta ni Romualdez. Segurong paburuton sa higanteng makinarya sa propaganda ni Romualdez ang pagpadayag sa hapit tanang kongresista sa pagdayeg sa iyang liderato nga kina-maayohan sukad masukad sa kasaysayan. Kon gidaog ang niaging duha ka eleksiyong presidensiyal og fake news, kinsay makabasol ni Romualdez nga nakumbinser nga iya sang masulod sa bolsa ang mga botante?