Kinsay magdala og buot?
Gihangop sa pipila ka senador ug kongresista ang giingong ceasefire sa Senado ug House of Representatives sa tinulisokay sa people’s initiative (PI) sa charter change (cha-cha) tungod sa pagkatuman sa duha ka kundisyon:
• Paghunong sa kuwestiyonable nga PI (nga gidudahang maniobra sa mga kongresista) nga nisugyot sa hiniusang botasyon sa 316 ka kongresista ug 24 ka senador sa cha-cha
pinaagi sa constituent assembly (con-ass); ug
• Pagsugod sa mga senador sa diskusyon sa gisugyot nga kausaban sa tulo ka economic provisions (pagmatuod nga gisalikway nilang kusganong pagsupak ug uyon na sa cha-cha).
Sa pagpatuman sa ceasefire, niinsistir ang kampo ni House Speaker Martin Romualdez nga di na imbestigahon sa Senado ang PI. Nagpasabot ba ni nga di na mahibaw-an:
• Diin gikan ang ₱20 milyones kada distrito nga giingon ni Senador Imee Marcos nga gibundak ni Romualdez aron paspas nga makolekta ang mga pirma;
• Kinsay nagtugot nga magamit sa PI ang Assistance to Individuals in Crisis Situation (AICS) sa Department of Social Welfare and Development (DSWD) ug Tulong Panghanapbuhay sa ating Displaced/Disadvantaged workers (TUPAD) sa Department of Labor and Employment (DOLE)?
Gipasalig sa mga senador nga ang ilang gisugyot nga usbon mao ra ang mga probisyon sa public services, edukasyon, ug advertising industry nga igo rang pun-an og "unless otherwise provided by law." Samtang way klarong kausaban nga gisugyot hingpit nilang giablihan ang mga probisyon sa bisan unsang kausaban nga mahunahunaan sa mga sakop sa Kongreso.
Nahibawo tang tanan kinsay tinuod nga nagkontrolar sa Kongreso: Gawasnon nang mga nagtungkawo sa Malacañang, karon ug sa umaabot, nga mowatas-watas sa Konstitusyon.
Wa say garantiya nga ang economic provisions ra nga gilista sa mga senador maoy tukion inig lingkod na sa con-ass. Kinsa man ang makapugong kon hilabtan sa mga kongresista ang term limits ug sistema sa gobyerno ug kanselahon ang umaabot nga mga eleksiyon?
Tradisyon sa Senado ang paghupot og baruganan nga indepente sa Malacañang. Kay, sama sa presidente ug bise presidente, tibuok nasud ang nibotar sa mga senador. Pero ang kalidad sa liderato ni Senate President Migz Zubiri ug sa pipila sa mga senador makahatag og abundang sukaranan sa pagduda sa kaligdong sa institusyon.