Nagmingaw nga mga paukyab
Sa unang higayon nga gipasanginlan ni kanhi Presidente Rodrigo Duterte si Presidente Ferdinand Marcos Jr. nga nag-cocaine ug huyang nga lider niadtong Nobyembre 2021, wa motuo ang iyang anak nga nag-runningmate ni Marcos ug ang mga botante nga nibalik ni Marcos sa Malakanyang.
Sa sunod higayon nga gitulisok ni Duterte si Marcos, atol sa rally sa Davao sa niaging buwan, nga bangag, adik ug mapalagpot sa puwesto sama sa iyang amahan, wa siyay dumadapig nga nagmartsa sa kadalanan ni nag-protesta sa Malakanyang aron pagpalayas sa anak sa diktador.
Sa unang higayon nga giawhag ni Duterte ang kasundalohan ug kapolisan niadtong Oktubre 2023 pag-lifestyle check nilang House Speaker Martin Romualdez ug sa mga kongresista, kon dili susihon sa Commission on Audit giunsa paggasto ang buhis sa katawhan, way sundawo ni polis nga nisanong.
Sa sunod higayon nga giawhag niya ang kasundalohan ug kapolisan, atol sa ilang rally sa Davao sa niaging buwan, sa pagpanalipod sa nasud ug sa katawhan gikan sa pangabuso sa administrasyon, hingpit nga suporta ni Marcos ang gipadayag sa liderato sa armadong kusog ug sa kapolisan.
Dihang nipasidaan nga moulbo ang mga protesta batok sa Charter change (Cha-cha) sa nagkalainlaing bahin sa nasud, gisalikway siya sa mga grupo nga orihinal nga nibatok sa Cha-cha sa di paglawgaw sa kawsa isip kahimanan sa ilang hakog nga panag-ilog sa gahom sa ilang mga kanhi alyado.
Dihang nihulga nga mobuwag ang Mindanao gikan sa Pilipinas, ang iya mismong tinudlo nga retiradong mga heneral maoy nisumbalik nga gamiton sa gobiyerno ang tanang puwersa pagpanalipod sa nasudnong teritoryo.
Kay wa na may nikurog sa iyang mga balikas ug mga panghudlat, napugos si Duterte sa pagpaluuy-luoy: Niadtong Disyembre, gisugo ang iyang tigpamaba nga si Harry Roque sa pagpasangil nga nakasud na sa Pilipinas ang mga imbestigador sa International Criminal Court (ICC); ug niadtong Martes nipahibawo si Roque nga nakadawat og kasayuran si Duterte nga ipadakop na siya sa ICC bisan unsang orasa.
Hangtod sa akong pagsuwat ini sa Miyerkules sa hapon, wa pay tapok sa mga dumadapig paglibot sa pinuy-anan ni Duterte sa Davao aron pagpanalipod niya. Tingali wa na sila motuo. O di na magpagamit.