Unay nga linigwatay
Ang pagduaw ni Presidente Ferdinand Marcos Jr. sa teritoryo sa mga Duterte maoy isog nga tubag sa mga pagsaway gikan nila: Ginganlan siya og bangag ug adik sa cocaine ni kanhi presidente Rodrigo Duterte ug gitawag siyang tapolan ug giawhag pag-resign ni Mayor Sebastian Duterte.
Sa upat ka kalihokan ni Marcos sa Davao niadtong Miyerkules, way lalaki nga sakop sa pamilyang Duterte ang nagpakita. Si Bise Presidente Sara Duterte Carpio ra ang nitambong sa kataposang tulo. Sa mga mata sa publiko, si Marcos nakamatuod nga wa mahadlok sa mga Duterte.
Ang kahapsay sa kinatibuk-an nga pagduaw sa presidente, way mga protesta ni mga balikas nga nakasal-ot, mahimong nagpasabot nga:
• Wa kaandam ang mga dumadapig sa mga Duterte sa pagpakita ni Marcos sa puwersa sa ilang kasuko sa ka way utang kabubut-on (ang kanhi presidente maoy nagpalubong ni Ferdinand Marcos Sr. sa Libingan ng mga Bayani) ug panaugdaog (gipatun-an niyang posibleng pagbalik sa Pilipinas sa International Criminal Court); o
• Nakumbinser sila sa bise presidente nga dasonan ang ulug-ulog nga duna pay paglaom ang Uniteam; o
• Maayo lang sila sa sulti.
Ang pagpagawas ni Marcos og ₱265 milyones nga hinabang para sa mga biktima sa lapad nga pagbaha ug pagdahili sa yuta sa Davao Region, apil nang Davao City:
• Makapahilom sa pasangil sa kampo sa mga Duterte nga gipasagdan sa Malacañang ang mga biktima sa katalagman aron pagbawos sa mga Duterte ug tungod sa katapolan sa presidente;
• Makamatuod sa kabinuang sa hulga sa pagbuwag sa Mindanao gikan sa Pilipinas; ug
• Makapahinumdom sa tanang hingtungdan kinsay tinuod nga nagkontrolar sa nasudnong panudlanan.
Wa moulbo ang gipasidaan nga people power pagpanalipod sa mga Duterte bisan sa ilang prayer rally sa Davao niadtong Enero 28, pagkondenar sa charter change, pagbanhaw sa Mindanao secession, ug pakiluoy nga mahimong ipadakop si Duterte bisan unsang orasa.
Sa pikas nga bahin, ang mga Duterte daghan og bantayanan: Posibleng pag-priso ni Apollo Quiboloy ug pag-revoke sa prangkisa sa iyang TV station, pagbanhaw sa kasong grave threat ni Kongresista France Casto batok sa kanhi presidente, pagkiha ni kanhi senador Leila de Lima sa mga nanggukod niya ug, nakatag-an ka, posibleng pagkabalhog sa prisohan sa The Hague.