Lit-ag sa cha-cha

Kon may uwaw silang Presidente Ferdinand Marcos Jr., iyang ig-agaw nga si House Speaker Martin Romualdez, ug ilang alyado nga si Senate President Migz Zubiri, angay sila nga mohunong dayon sa ilang kara-kara nga kampanya sa charter change (cha-cha) ug mangayo og pasaylo sa katawhan.

Kini human napamatud-an ni retiradong Supreme

Court senior associate justice Antonio Carpio nga wa sila kahibawo sa ilang gipanulti: Nga ang pag-usab lang sa 1987 Constitution ang makapalambo sa nasudnong ekonomiya kay makadani sa langyaw nga mga negosyante pagbubo sa ilang puhonan sa atong nasud.

Sa iyang pag-atubang sa cha-cha public hearing sa Senado gahapon, si Carpio nipahinumdom sa mga senador nga:

• Gitugotan na sa nangagi nga mga administrasyon ang mga langyaw sa pagpanag-iya og 100% sa mga planta sa kuryente nga naggamit og coal, oil, ug gas;

• Gitugotan na sa Korte Suprema ang pagpanag-iya sa mga langyaw sa 100% sa hydro power plants; ug

• Gitugotan sa administrasyong Marcos sukad sa 2022 pinaagi sa Department of Justice ug Department of Energy ang pagpanag-iya sa mga langyaw sa 100% sa geothermal, solar, ug wind power plants.

Sa ato pa, bakak ang kinakusgang argumento nilang Marcos, Romualdez, Zubiri, ug kaubanan sa pag-usab sa Konstitusyon. Sakto si Carpio nga ang Pilipinas maoy labing luag og mga balaod sa foreign investments di lang sa Southeast Asia kon dili sa tibuok Asya.

Di makapa-goryo-goryo silang Zubiri, Romualdez, ug mga senador ug mga kongresista kay silay nag-abli sa ekonomiya ngadto sa 100% nga pagpanag-iya sa mga langyaw pinaagi sa kausaban sa Public Services Act ug Retail Trade Liberalization Act.

Salamat sa kamakinaadmanon ni Carpio, mabantang na ang tinuod nga tuyo sa administrasyong Marcos sa pagpamugos sa cha-cha: Ang paglugway sa ilang mga termino ug pagpalapad sa ilang gahom. Dunay sukaranan ang mga kahadlok nga pantalya ra ang pasalig nga economic provisions ray ipaubos sa cha-cha.

Kay kon molingkod na ang Kongreso isip constituent assembly, wa nay makapugong sa administrasyon sa pagpayuhot sa bisan unsang kausaban nga ilang mahunahunaan. Apil na ang pag-usab sa sistema sa gobyerno. Ug, simbako, layo ra to, tabukon og pito ka lawod, pagkanselar sa umaabot nga mga eleksiyon.