Pagbungkag sa highway

Nagkalainlain ang mga rason sa Department of Public Works and Highways (DPWH) sa pagbungkag sa sementado nga kadalanan nga para sa kinabag-an sa mga motorista ug mga pasahero maayo pa ang kahimtang:

• Dunay pino nga mga liki mao nga bisan di maklaro sa mga tawo kinahanglan nang ilisan;

• Maayo pang tan-awon sa publiko pero duna nay seryusong mga depekto segun sa mas tukma nga monitoring sa ilang computers; ug

• Maayo pa ang kahimtang pero wa na makapasar sa bag-o nilang mga lagda sa gilapdon sa dalan ug gibag-on sa semento.

Bag-o ang rason nga akong nahibaw-an sa plano sa DPWH pagbungkag sa nasudnong highway sa Mandaue City ug Consolacion sa amihanang Sugbo: Ang orihinal nga plano mao ang pagkagis sa napahak nang aspalto nga gipa-ibabaw sa semento; pero ang naaprobahan ug nagahinan og kuwarta mao ang paglangkat sa semento aron kailisan og bag-o.

Sa ato pa, gub-on sa DPWH ang highway ug mas pakamangon ang trapiko sa Norte bisan wa mangayo sa proyekto silang Mandaue City Jonas Cortes, Consolacion Mayor Nene Alegado, Kongresista Daphne Lagon ug Kongresista Lolypop Ouano.

Kinsa man ang nasayop? Beteranong mga opisyal sa DPWH nibasol sa pataka sa bag-ong mga inhinyero sa planning division ug sa papirma sa mas dagkong mga opisyal sa way pagbasa sa mga dokumento maong nakalusot ang higanteng sipyat.

Dihang nabantayan ang anomaliya, uwahi na ang tanan: Nahatagan na og budget gikan ulohang buhatan, nahuman na ang subasta, ug na-award na ang multi-milyones pesos nga mga proyekto ngadto sa nidaog nga mga kontraktor.

Nahibaw-an nako gikan sa mga molupyo sa Liloan ug Consolacion nga nagsugod na ang pagbuslot ug paglangkat sa sementadong dalan duol sa utlanan sa duha ka lungsod. Nga usa sa tulo ka bahin sa nasudnong highway nga gub-on; ikaduha, ang luna gikan sa eskina Canduman paingon sa ABS-CBN; ug ikatulo, ang luna sa atubangan sa Fooda paingon sa SM Consolacion.

Di angay nga paundayonan sa DPWH ang sayop. Ila mismong mga inhinyero momatuod nga maayo pang sementadong highway kay ang asphalt overlay ray nakankan. Hinaot nga motabang silang Cortes, Alegado, Lagon, ug Ouano pagbaraw ning pag-usik-usik sa buhis ug wa kinahanglanang paglahugay sa highway.