Sukarap sa AKAP
Kon imong paminawon si House Speaker Martin Romualdez, puwerteng nindota sa labing bag-ong programa nga ilang gilusad aron pagtabang sa mga pamilya nga kinagamyan og kita karong tuiga. Ang AKAP (Ayuda sa Kapos ang Kita), matod ni Romualdez, ilang gitumong nga mohaw-as sa kalisod sa mga trabahante nga ubos og suholan.
Gipahibawo ni Romualdez nga ang Department
of Social Welfare and Development (DSWD) mao ang itahasan sa pagpatuman sa AKAP. Nipasalig siya nga kon magmalampuson ang programa karong tuiga, ilang ipadayon ug palapdan pa sa pagpatuman sa sunod tuig 2025.
***
Pero dunay mga problema ang AKAP:
• Nikumpisal ang kadagkoan sa DSWD nga ang AKAP di ilang programa, nga wa sila moawhag nga pundohan ang programa, nga wa sila kahibawo sa katuyoan sa programa, ug nga wa sila kahibawo unsaon sa pagpatuman ang AKAP kay wa pay detalye kinsa ang makadawat ug unsaon sa pag-apud-apod ang ayuda; ug
• Tungod tingali sa katalagsaon sa AKAP, nakalimot silang Romualdez ug mga kongresista sa pagapil ini sa bersiyon sa 2024 budget nga ilang giaprobahan sa House of Representatives ug gipadala ngadto sa Senado.
***
Laing kahibulongan sa AKAP:
• ₱60 bilyones ang budget sa AKAP nga gipahibawo ni Romualdez human pirmahi ni Presidente Ferdinand Marcos Jr. ang 2024 budget niadtong Disyembre pero ₱26.7 bilyones ra ang nadawat sa DSWD para sa programa; ug
• Sa way pagkonsulta sa DSWD, gipahibawo nang Romualdez nga 12 milyones ka pamilya nga dunay binuwan nga kita nga ₱23,000 paubos maoy makadawat sa one-time nga ayuda nga ₱5,000 kada pamilya.
***
Daghang programa ang DSWD ug ubang ahensiya nga gitun-an ug napamatud-an nga makatubag sa dinaliang panginahanglan sa katawhan pero gilaslasan sa Kongreso tungod sa kakuwang sa pundo. Gipamugos hinuon ang AKAP nga way nirekomendar ug gibundakan og dakong pundo nga way nangayo. Ang AKAP morang tartanilya nga nag-una sa kabayo.
Pila pa ka programa nga, pareha sa AKAP, gisekreto lang og sukip sa budget aron ka-parkingan og daghang kuwarta? Nga kay wa may detalye unsaon sa pagpatuman, wa man gani ideya ang gipasilongan nga mga ahensiya, sayon rang makuot ug maggasto sa bisan unsang katuyoan nga mahunahunaan sa mga utok sa maniobra?