Nagkurog sa kahadlok

Puwerteng hadloka ni kanhi presidente Rodrigo Duterte nga maposasan ug mabalhog siya sa prisohan sa International Criminal Court (ICC) sa The Hague sa Netherlands nga:

• Nidemanda na siya og garantiya gikan sa administrasyon ni Presidente Ferdinand Marcos Jr. nga di mahitabo nga ilang tugotan ang ICC nga makapanghilabot niya ug sa iyang anak nga si Bise Presidente Sara Duterte Carpio;

• Nideklarar na siya nga ang mga pasalig ni Marcos sa pagpanalipod niya di mahimo nga isulti lang kon dili kinahanglan nga isuwat pinaagi sa usa ka pormal nga executive order. ***

Sukwahi sa isog niyang pamalikas, panghagit, ug panghudlat, masihag ang higanteng kabalaka ni Duterte sa sulti sa iyang abogado nga si kanhi presidential spokesman Harry Roque. Nga klarong naglibog kon magpakiluoy o mangisog ba. Mao nga:

• Iyang gisaway si Marcos Jr. sa pag-usab-usab sa iyang baruganan sa ICC ug ubang mga kontrobersiya; pero

• Iyang giklaro nga wa manginsulto sa presidente ni magkuwestiyon sa kalig-on sa mga desisyon sa Malacañang; ug

• Iyang gipasalig nga igo lang niawhag ang mga Duterte pagpanalipod sa nasudnong sobereniya batok sa pagpanghilabot sa mga langyaw.

***

Ang pagpangayo sa mga Duterte og executive order batok sa ICC nagmatuod nga wa makakuha og igong suporta ang nahauna nilang mga pagsuway sa pagtay-og sa administrasyon pinaagi sa:

• Paghulga og kudeta nga mopalayas ni Marcos Jr. sa puwesto sama sa nahitabo sa iyang amahan;

• Pagtawag sa presidente nga bangag ug adik sa cocaine;

• Pagpasidaan nga ilang pangulohan ang nasudnong kampanya batok sa charter change; ug

• Paghulga nga mobuwag ang Mindanao gikan sa Pilipinas.

***

Para sa kanhi presidente di sab paigo ang mga pasalig nga di motabang ang administrasyon sa ICC nga sunudsunod nga giluwatan sa presidente, Department of Justice, Office of the Solicitor General, ug Philippine National Police. Sa laktod wa silay salig bisan unsay isulti sa Malacañang.

Ambot wa bay nakahunghong niya nga bisan ihatag pang Marcos Jr. ang ilang gipangayo nga executive order di gihapon siyang makabalik og bukot sa habol ug makatug na og tarung sud sa iyang moskitero. Kay ang executive order mahimong bakwion pagka sunod adlaw ug pulihan og deklarasyon nga mas importante diay ang pagpatigbabaw sa rule of law.