Mga Sugbuanon sa NMP
Di lang usa, di lang duha, kon dili tulo g’yud ka Sugbuanon ang naglingkod isip mga sakop sa Board of Trustees (BOT) sa National Museum of the Philippines (NMP). Hinaot nga silang tulo maghiusa sa pagbarug para sa katarung. Ug mopasabot sa ilang kaubanan sa panginahanglan sa pag-uli sa labing daling panahon sa ilang gihuptan nga pulpit panels sa simbahan sa Boljoon, Cebu. Nga gipamatud-an sa Cebu Archdiocese nga gikawat dul-an sa upat ka dekada na ang nilabay.
Kay kon mangiyugpos ug magpakahilom lang, maduhig sila sa pagsaway ug posibleng kaso.
* * *
Ang di maayong balita mao nga pabilin silang hilom. Bisan pila na ka adlaw ang eskandalo. Kasaligan namong tinubdan niila sa tulo ka Sugbuanon sa BOT sa NMP (duha nila tinudlo ni Presidente Ferdinand Marcos Jr. ug usa ex-officio, nakalingkod tungod sa iyang puwesto sa Gabinete):
• Si Andoni Aboitiz gitudlo nga chairman sa Disyembre sa niaging tuig human nilingkod isip sakop sa BOT sukad sa 2019;
• Si Philip Y. Rodriguez gitudlo nga, sama ni Aboitiz, representante sa pribadong sektor; ug
• Si Tourism Secretary Ma. Esperanza Christina Garcia Frasco. * * *
Nilang tulo, si Aboitiz ang labing apiki. Kay tagduma sa ilang bangko ang nangangkong nakapalit sa panels, nga imbes i-uli sa simbahan sa Boljoon iyang gi-donar sa NMP.
Si Edwin Bautista maoy presidente ug chief executive officer sa UnionBank, kansang majority shares gipanag-iya sa mga Aboitiz (50%), Social Security System (18%) ug Insurance Life Assurance Co. (10%). Koneksiyon nilang Aboitiz ug Bautista maoy posibleng katin-awan nganong giduphan dayon sa NMP nga legal ang pagpalit sa panels.
* * *
Kon si Frasco ug Rodriguez mopalabi sa ilang kaikog ni Aboitiz, dunay tulo ka politiko nga ex-officio members sa BOT nga mahimong ma-influencia sa 3.2 milyones ka rehistradong mga botante sa Sugbo ug mokumbinser sa NMP sa pagtahan sa panels ngadto sa tinuod nga tag-iya:
• Senador Loren Legarda, chairwoman sa Senate Committee on Culture and the Arts (girepresentahan ni Senador Nancy Binay nga maoy iyang vice chairwoman);
• Bise Presidente Sara Duterte-Carpio isip Education secretary; ug
• Kongresista Roman Romulo, chairman sa House Committee on Basic Education and Culture, nga hagbay rang nangambisyon sa Senado.