Rama ug mga Duterte
Tulo ra ka diskurso ang akong nadunggan sa rally sa South Road Properties (SRP) sa Cebu City niadtong Domingo sa gabii: Ilang Mayor Mike Rama, kanhi Presidente Rodrigo Duterte ug Davao City Mayor Sebastian Duterte. Nagrepresentar sila sa tulo ka bisyo nga para nako maoy simbolo sa tibuok nga kalihokan:
• Pagpakaaron ingnon (ang pagpasangil sa ubang mga tawo sa mga binuang nga ila sab nga gihimo);
• Pagdumili sa pag-angkon nga niabot na ang labing gikahadlokan nga adlaw sa panudya; ug
• Kahilas (pagpanulisok sa eskandalo nga mosumbalik ra sab nila).
Diskurso ni Rama maoy sampol sa pagpakaaron ingnon. Siya ray nagbalikbalik og siyagit sa tema sa rally nga “Cebu is not for sale!” Tingali kay mao ang iyang hilig: Paghimo og mga slogan nga siya ray giganahan, pulos ra istorya, mao nga way kahigayonan nga mapatuman.
Pero pila ra ka metro gikan sa iyang entablado ang labing klaro nga mga ebidensiya sa pagkahalin: Ang pagbutang og U-turn slot ug traffic lights sa South Coastal Road, bisan sa mga pasidaan nga mameligro ang mga motorista ug mokamang ang trapiko.
Pakigpung sa kanhi presidente maoy dagway sa pagbalibad sa responsibilidad sa iyang binuhatan. Giagak aron maka-aginod og lakaw, nagpaugat gihapon sa paglikay sa tulubagon sa kaliboan ka kinabuhi nga gi-ihaw sa iyang administrasyon sa Davao ug Malakanyang.
Nagdagtom niyang bayhon sa entablado maoy pahinumdom nga nahimo ang kalihokan tungod sa pagtugot ni Rama. Nga iyang gitawag nga “drug protector” niadtong 2016 (dihang hawod pang nibasa og mga lista) ug “Governor Rama” (pagtimaan giunsa pag-usik-usik ang iyang intelligence funds).
Hilas ang mensahe ni Mayor Duterte. Gitawag niya nga “scam” ang pagsaad ug kapakyas ni Presidente Ferdinand Marcos Jr. paghimong 20 pesos sa kilo sa bugas humay. Gipakpakan siya ug angay lang kay nagsulti sa tinuod.
Pero wa isulti nga iyang amahan nisaad ug napakyas sab paghimong P25 kada kilo sa bugas humay human pirmahi ang Rice Tarrification Law niadtong 2019. Wa sab mahisguti ang mga saad pagsulbad sa ilegal nga drugas sud sa tulo ka buwan, paghunong sa pangurakot pinaagi sa pagpatay sa kawatan nga mga opisyal sa gobyerno ug pagpadagan og tren sa Mindanao.