Mayoriya ni Quiboloy
Kon utang kabubut-on ang ilang ipatigbabaw, mosupak ang mayoriya sa mga sakop sa Senate Committee on Women sa pagpadakop sa Senado ni Apollo Quiboloy kay mapasalamaton sa iyang endorsement sa nangaging mga eleksiyon silang Migz Zubiri, Loren Legarda, Cynthia Villar, Mark Villar, JV Ejercito, Nancy Binay, Robin Padilla, Grace Poe, Bong Go, ug Imee Marcos. Upat na nila ang nidupa ni Quiboloy: Padilla, Marcos, Cynthia Villar, ug Go. Si Poe pa ang nisuporta sa pagluwat og arrest warrant nga giawhag nilang Committee chairwoman Risa Hontiveros ug Senate Minority Leader Koko Pimentel.
Bisan unsang natabang nila si Quiboloy angay nga balansehon sa mga senador sa kaseryuso sa mga pasangil batok niya. Gawas pa:
• Angay lang siya nga ipadakop kay ni-isnab sa supina nga gipirmahan ni Zubiri ug giluwatan sa Senado isip institusyon;
• Kon madakpan, di bitayon si Quiboloy kon dili hatagan sa tanang kahigayonan sa pagpanalipod sa iyang kaugalingon; ug
• Kon pasagdan si Quiboloy nga di mo-atubang kay malapas ang iyang mga katungod, ang ubang pasanginlan og kahiwian mogamit sa samang depensa paglikay sab sa umaabot nga mga imbestigasyon sa Kongreso.
Hinaot nga ma-impluwensiya ang mga senador sa kamatuoran nga bisan di nila ipadakop si Quiboloy karong semanaha, mahimo ra gihapon siyang ipadakop sa House of Representatives sa sunod semana. Kon magpadayon siya sa pagtago ug isnabon sab ang supina.
Lahi sa mga senador, mas isog ang mga kongresista nga mopa-posas ni Quiboloy. Kay wa siyang katabang sa kampanya sa mayoriya nila. Gawas pa, gipagamit ang iyang TV station sa pagpakauwaw sa speaker ug sa institusyon.
Angayng pahinumdoman ang mga senador nga mas lisod duphan si Quiboloy kay sa iyang padrino nga si kanhi presidente Rodrigo Duterte. Kay samtang si Duterte nibalitok ug nakig-amigo nang Presidente Ferdinand Marcos Jr., si Quiboloy nipasangil sa presidente ug sa iyang asawa nga nagpasiugda og drug sessions, sex orgies, ug devil worship sa Malacañang.
Laing rason: Gisugdan na sa US Department of Justice ang extradition process batok ni Quiboloy. Labing importente: Di makatabang sa mga senador nga magpa-reelect sunod tuig nga mangalisbo sa pagduda nga mahimong way kalainan sa ilang tigsuporta nga suspek sa pagpangilad ug pagpanguwarta.