Pagluklok ni Quiboloy
Sa di pa mahinayak og luklok sa suok, si Apollo Quiboloy angay nga mamalandong sa kontrobersiya sa pipila ka obispo sa Simbahang Katoliko 13 ka tuig ang nilabay. Sama ni Quiboloy karon, ang mga obispo niadtong 2011 gipasanginlan nga nakalapas sa balaod. Sama ni Quiboloy, ang mga obispo gipatawag sa Senado.
Pero lahi ni Quiboloy, ang mga obispo wa magpaabot nga luwatan og supina. Boluntaryo silang niatubang sa mga senador ug nanubag sa ilang mga pangutana. Labaw sa tanan, nikumpisal ang mga obispo sa ilang sayop ug nangayo og pasaylo.
***
Ang mga obispo nga naglakip sa dagkong opisyal sa Catholic Bishops Conference of the Philippines (CBCP) wa mopasangil sa imbestigasyon sa Senado nga nagpakauwaw nila, wa moinsistir nga ang pagtambong sa imbestigasyon makalapas sa ilang katungod ug wa mopasalipod sa mga abogado aron paglikay sa imbitasyon.
Wa sila motulisok sa mga namasangil nila. Wa sila magpa-goryo-goryo nga way kalibotan sa mga detalye sa giingon nga kalapasan nga ilang nahimo. Wa mosugo sa ilang mga dumadapig pagsaba-saba sa gawas sa Senado aron pagpanalipod nila ug pag-awhag nga papason ang Kongreso.
***
Ginganlan sa Commission on Audit niadtong 2009 ang mga obispo nga nakadawat og mga sakyanan sa Philippine Charity Sweepstakes Office ubos ni kanhi Presidente Gloria Macapagal-Arroyo:
Cotobato Archbishop Orlando Quevedo, nahimong kardinal sa 2014 (Toyota Grandia Hi-Ace); Butuan Bishop Juan de Dios Pueblos, namatay sa 2017 (Mitsubishi Montero); Basilan Bishop Martin Jumoad, taga Sugbo nga karon Arsobispo sa Ozamiz (Mitsubishi Strada); Zamboanga Archbishop Romulo Valles, karon Arsobispo sa Davao (Toyota Grandia Hi-Ace); Bontoc-Lagawe Bishop Rodolfo Beltran, namatay sa 2017 (Nissan Pathfinder); ug Abra Bishop Leopoldo Jaucian (Mitsubishi Strada).
***
Niangkon si anhing Bishop Pueblos nga sayop ang iyang pagsuwat ni Arroyo ug pagpangayo og sakyanan isip birthday gift. Si Arroyo gipasanginlan nga nibuhong sa mga obispo aron di mo-awhag ang CBCP sa iyang resignasyon tungod sa dagko niyang eskandalo.
Bisan gideklarar sa mga senador nga way balaod nga nalapas, gipahibawo ni Kardinal Quevedo nga nakahukom sila pag-uli sa tanang pito ka sakyanan aron di maduhig ang tibuok simbahan. Hinaot nga makumbinser si Quiboloy nga mas makaayo ang paggakos sa kahayag kay sa pagtago sa kangitngit.