Kawatan ug bakakon
Sukwahi sa pangangkon ni Presidente Ferdinand Marcos Jr. nga wa kapamatud-i ang kinawat nilang katigayonan sa tanang kaso nga gipasaka sa gobyerno batok sa ilang pamilya, nahukman sa Korte Suprema nga kawatan ang ilang pamilya. Niadtong Hulyo 15, 2003, ni-desider ang labing taas nga korte sa nasud nga angayng ibalik sa mga Marcos ang kinawat nilang katigayonan ngadto sa gobyerno.
Mao ni alas sa mga Marcos nganong nakabalik sila sa Malacañang. Di sila mohunong sa pagpamakak. Bisan nabantang na sa tibuok kalibotan ang ilang ka-kawatan, magpapating lang gihapon sila og pangangkon nga gipakauwawan lang ang ilang pamilya. Hinaot nga di sab ta kapoyan sa pagpakayab sa kamatuoran.
***
Ang tinuod mao nga nigamit ang Korte Suprema sa labing yano nga sukdanan sa pagsusi nangawat ba g’yud ang mga Marcos. Ilang gisubay ang tanang kuwarta nga natigom nilang anhing Ferdinand Marcos Sr. ug kanhi unang ginang Imelda Romualdez sukad sa ilang pagbanos sa Malacañang sukad sa 1965 hangtod napalayas sila sa 1986.
Kay wa man magtagad ang mga Marcos sa pagsumiter sa tinuig nila nga statement of assets and liabilities, gigamit sa mga mahistrado ang bugtong opisyal nga dokumento sa ilang kita: Ang suholan nga ilang nadawat sud sa 21 ka tuig nila nga pagtungkawo sa gahom.
***
Ug mao ni ang opisyal nga report sa budget minister ni Marcos:
• ₱660,000 ang suweldo ni Marcos Sr. sa 1966-1976;
• ₱800,000 ang suweldo ni Marcos Sr. sa 1977-1984;
• ₱718,750 ang suweldo ni Imelda sa Hunyo 1976-Pebrero 1986 isip human settlements minister; sa ato pa
• ₱2,319,583.33 ang kinatibuk-ang suweldo sa magtiayon.
***
Maong nideklarar ang Korte Suprema nga ₱2,319,583.33 ray lehitimo nga kita sa mga Marcos. Ang tanang sobra nga masakpan sa Presidential Commission on Good Government (PCGG) maisip na nga kinawat.
Maglisod si Marcos Jr. paglalis sa hukom sa Korte Suprema nga kinawat ang Swiss bank deposits sa Pamilyang Marcos, nga niabot og ₱36 bilyones hangtod sa Enero 31, 2002. Pero maayong pagkaliwat sa iyang amahan. Nga, dihang nasakpan niadtong 1946 nga peke ang giangkong mga medalya, gihulagway sa US Army nga “padayong namakak nga wa mausab ang nawong.”