Giisnab ang mga bata
95 ka bata sa Pilipinas ang mangamatay kada adlaw tungod sa malnutrisyon, segun sa United Nations Children’s Fund (UNICEF). 27 sa kada 1,000 ka bata mangamatay sa di pa makatungtong sa ikalima nilang birthday. Usa sa kada tulo ka bata ang nasawot, o mas mubo sa ilang edad.
Bisan sa kadako sa tampo sa malnutrisyon sa kalisod sa mga estudyante pagkat-on sa ilang mga leksiyon, si Bise Presidente ug Education Secretary Sara Duterte Carpio wa mopadayag og simpatiya para nila. Nidemanda hinuon og hustisya para ni Apollo Quiboloy.
***
Nagkagrabe ang pagpanghasi nga nahiagoman sa mga mangingisda nga Pilipino sa Scarborough Shoal, Pag-asa Island ug ubang pangisdaan sa West Philippine Sea (WPS). Nisamot ang hulga sa ilang panginabuhi tungod sa pag-ilog sa China Coast Guard ug Maritime Militia sa ilang mga kuha.
Bisan sa kalapad na sa kadaot sa corals tungod sa artificial islands ug ubang reclamation projects sa WPS ug bisan may naangol na nga mga tripulante sa Philippine Coast Guard, si Carpio way mensahe parte sa WPS. Nag-Mandarin hinuon sa pagpahalipay sa anibersaryo sa People’s Republic of China.
***
Nagkinahanglan og dugang pundo aron pagkuha og dugang mga magtutudlo ug aron ma-umintohan ang ilang suholan ug benepisyo. Nagkinahanglan og dugang pundo sa pagtukod og dugang classrooms aron nga di maghuot o mag double o triple shift ang mga klase.
Way klarong mensahe si Carpio pagsugyot og sulbad sa seryusong mga problema sa mga magtutudlo ug mga estudyante. Pero abunda ang iyang pangaway pagpahilom sa mga nangayo og kuwentada giunsa paggasto ang iyang nangaging confidential funds.
***
Nganong wa may luna sa kasingkasing ni Carpio ang mga bata nga namasangil nga gipanlugos, mga bata nga di kasabot sa leksiyon kay way kaon, mga bata sa mangingisda nga mas gipanggutom kay nagkanihit ang kuha, ug mga bata nga kasurenderon na sa duka kay lawom nang gabii ang klase?
Tungod ba kay nabusog na sa mga grasya sa ilang kasikit ni Quiboloy, kay nabusdik na sa mas daghan nga mga gasa gikan sa China, ug kay natagbaw na sa kalalim sa paghurot sa ₱125 milyones sa buhis sa katawhan sud lang sa 11 ka adlaw?