Gikahadlokan ni Quiboloy
Gawas sa pag-insistir nga malapas ang iyang mga katungod, si Apollo Quiboloy posibleng ni-isnab sa mga imbestigasyon sa Senado ug sa House of Representatives kay nahadlok nga mosamot kaapiki kon sublion ang talagsaon niyang mga pangangkon:
• Nga si Presidente Ferdinand Marcos Jr. ug First Lady Liza Araneta Marcos maoy nangulo sa drug sessions, sex orgies ug devil worship sud sa Malakanyang batok niya ug nilang kanhi Presidente Rodrigo Duterte ug Bise Presidente Sara Duterte Carpio;
• Nga nakigkosabo sa Estados Unidos silang House Speaker Martin Romualdez ug Presidente Marcos aron dagiton ug patyon siya;
• Nga di siya kinahanglan nga manglugos kay giilogan siya sa kababayen-an nga mga sakop sa iyang organisasyon;
• Nga nikatap ang makalilisang nga Omicron variant sa Covid-19 isip silot sa Ginoo kay gigukod siya sa Estados Unidos pinaagi sa Federal Bureau of Investigation (FBI) nga nipasaka og mga kaso (conspiracy to engage in sex trafficking by force, fraud and coercion ug sex trafficking of children; sex trafficking by force, fraud and coercion; conspiracy; ug bulk cash smuggling) batok niya; * * *
• Nga nihunong ang linog sa Mindanao niadtong 2019 kay iyang gisinggitan pero gipasagdan niya ang kabangis sa bagyong Tisoy sa samang tuig kay gibugal-bugalan siya sa netizens sa social media;
• Nga ang iyang inahan nga si Maria Carreon samtang nagmabdos niya (kamanghoran sa siyam) niadtong 1950 nakakita sa Ginoo nga niingon nga, “Ako nang anak;”
• Nga naseguro nga siya ang tinudlo nga anak sa Ginoo tungod sa tingog nga iyang nadunggan sa Seoul, South Korea niadtong dekada 80 nga nagkanayon, “Gamiton ta ka;”
• Nga nahingpit ang iyang pagka tinudlo nga anak sa Ginoo sa lima ka tuig niyang pag-inusara sa bukid sa Barangay Tamayong sa Davao City nga saging ra ang iyang gikaon;
• Nga giingnan siya sa Ginoo nga ang iyang ngalan nga Apollo mao nga ang ngalan sa Ginoo ug usa na lang ang ngalan niya ug sa amahan;
• Nga giingnan siya sa Ginoo nga segurong modaog sa pagka presidente dayong eleksiyon sa 2010 mao si Gibo Teodoro; ug
• Nga giingnan siya sa Ginoo nga segurong modaog sa pagka presidente dayong eleksiyon sa 2022 mao si Bong Go.