Samtang dunay Chocolate Hills
Sa among panagsulti sa taliwa sa Chocolate Hills niadtong dekada 90, si Roy Erecre nga giila sa militar nga sakop sa Central Committee sa Communist Party of the Philippines (CPP), naneguro nga di mapapas ang mga rebeldeng komunista sa Bohol.
Matod ni Erecre nga nahibawo ang militar nga ang Chocolate Hills ang ilang tagoanan. Pero maglisod sila og tultol asa sa 1,776 ka bungtod ang ilang nahimutangan. Nideklarar siya nga samtang naa pa ang Chocolate Hills magpabiling buhi ang armadong pakigbisog batok sa mga inhustisya ug pangabuso sa gahom.
***
Nikomedya ang iyang kaubanan nga mas naglisod ang militar pagpangita nila human sila nakat-on sa paggamit og Liquefied Petroleum Gas (LPG) sa pagluto sa ilang pagkaon. Nasulbad ang ilang problema pagtago sa aso sa mga sugnod nga kahoy gikan sa nagpatrolya nga mga polis ug mga sundawo.
Ang tinuod mao nga gilibotan ang ilang mga kampo sa mga mag-uuma nga nagtikad sa yuta pero abtik nga ni-senyas sa pagkakita sa nagkaduol nga mga unipormado. Sa ingon, nakabakwet dayon ang puwersa ngadto sa mas luwas nga mga bahin sa kabukiran.
***
Nimenos ang mga engkuwentro sa mga rebelde ug sa militar ug wa na kong kadungog ni Erecre dihang nahuman ang 260 ka kilometro nga circumferential road nga usa sa mga proyekto ni anhing Bohol Governor Erico Aumentado.
Nahibaw-an nako ngano sa sunod nakong suroy sa Chocolate Hills isip turista uban sa akong asawa: Pipila sa tour guides nihunghong nga apil sila sa nisugat sa akong pagduaw sa ilang kampo. Nibiya sila sa kalihokan kay duna nay panginabuhi.
* * *
Akong nabalitaan nga nibiya si Erecre sa Bohol ug nibalhin sa pagpangu sa mga rebelde sa Negros Island. Hangtod nga nadakpan siya sa militar samtang nagpatambal sa Davao niadtong 2014. Napriso siya sa Bohol pero nakapiyansa ra sab dayon uban ang tabang sa iyang mga abogado nga gipangulohan ni kanhi gobernador Victor Dela Serna.
Samtang nasentro ang nasudnong atensiyon karon sa resorts nga natukod sa Chocolate Hills, dunay laing mga panghitabo sa kabukiran. Ang engkuwentro tali sa militar ug sa mga rebelde sa Bilar, Bohol, sa niaging buwan mahimong pruyba sa pasalig ni Erecre nga di sila mapapas.