Utrong imbestigahunon
Kon mahinayon si Senador Cynthia Villar sa pagduma sa imbestigasyon sa pagkatukod sa resorts sa protected areas sa Chocolate Hills sa Bohol, angay nga magbawon og daghang tubig ang mga opisyal sa Department of Environment and Natural Resources (DENR).
Kon ang umaabot nga imbestigasyon, nga gitakdang himuon human sa ocular inspection sa Sagbayan ug Carmen sa Bohol, susama sa nangaging hearings sa iyang gipangulohan nga Senate Committee on Environment and Natural Resources, kinahanglan nga manghilam-os silang DENR Secretary Ma. Antonia Yulo-Loyzaga ug kaubanan kay seguro sila nga magkamuritsing sa kasaba.
***
Di angayng kuyawan ang mga politiko nga gipasanginlan nagpabaya sa paggusbat sa Chocolate Hills. Makaginhawa og luag silang Bohol Gobernador Aris Aumentado, Sagbayan Mayor Juan Suarez, ug kaubanan. Kay di sama kainit ang dugo ni Villar sa lokal nga mga opisyal. Posibleng rason mao nga mapupos nang iyang termino. Lahi sa ubang dinastiya nga matagbaw og usa, ang mga Villar nagkinahanglan og duha ka lingkoranan sa Senado. Si Senador Mark Villar paresan sa lain niyang anak nga si Camille. Maong di niya kasab-an ang political leaders nga makatabang nila.
***
Wa siya magkinahanglan sa DENR sa ilang pamolitika. Mahimo pa gani nga makadugang sa ilang mga botante ang pagsige niya og yawyaw nila.
Bahala na kon ang pagka apiki sa Las Piñas ug ilang mga negosyo nga naligsan sa palusot sa ubang developers, ug dili ang interes sa mga botante, ang rason sa iyang pagdumot sa DENR ug ubos nga mga ahensiya. Sama sa Protected Area Management Board (PAMB) nga gisugdan na niya og basol sa Bohol.
***
Pero nagkinahanglan sila sa DENR sa hapsay nga pagpatuman sa ilang subdivisions, mga minteryo, ug ubang mga negosyo. Nga maoy rason sa environmental groups pagkuwestiyon sa kahaom ni Villar pagduma sa imbestigasyon sa protected areas. Kay ambot pila ka ektarya sa mga umahan ang kalit lang nga nahimong subdivisions ug napalayas ug nakulban sa kaldero ang kaliboan ka mga maguuma ug mga sakop sa ilang pamilya. Di mabasol ang taga DENR, mga politiko, environmentalists, ug ubang resource persons nga ipatawag ni Villar. Nga motutok niya ug sa hilom motuaw nga utro siyang imbestigahunon.