Pagkapislat ni Quiboloy

Sakto g’yud ang pahimatngon sa atong katiguwangan: Ayaw pag-apil-apil kon magbugno ang mga higante, kay ikaw ang unang mapislat. Wa tingali masultihi si Apollo Quiboloy. O kon nasultihan man wa motuo, kay kumbinsido sa pangangkon nga siya ang appointed son of God.

Giapilan ni Quiboloy, sinalikway ang kinaadman sa mga nag-una sa duyan, ang away sa mga Marcos-Romualdez ug sa mga Duterte sa pikas nga bahin. Tuod man, sa una pa lang hugna sa kumbate, si Quiboloy ug ang iyang TV station ug relihuyuso nga organisasyon dayon ang nasikwate.

Kay ang mga higante duna may igo nga puwersa ug gidak-on, sayon rang mosagang ug mopapha sa bisan unsang atake nga mahiagoman. Mag-ikogay sab pagbuhi sa tanang bunal kay nahibawo nga makasukol ug makabawos ang nagbuntaog sab nilang kaatbang.

Para sa mga dagko, mas dali nga inudnod ang mga duwende. Nga mao si Quiboloy, bisan nagtuong labihan na kahawod kay nakayatak og daghan nga mas gagmay. Wa siyay kalainan sa upos sa tabako nga napulbos dihang, imbes mopadaplin, hambogero hinuon kaayo nga nataliwad-an sa duha ka nagkabangga nga mga kapre.

Nataligam-an sab ni Quiboloy ang lain nga pasidaan sa atong katiguwangan: Di maayo nga mopalit sa away sa mga higante kay kon magka-uli na sila padayon ka nga ilhon nga kaaway. Wa pay klaro nag-away pa ba o nagkahigala na pagbalik ang mga higante sa UniTeam, pero nahunong na ang mga hudlat ug mga insulto tali sa duha ka kampo.

Pero si Quiboloy wa nay prangkisa ug morang ilaga nga nagtagu-tago na.

Way nagpaabot nga magpadayon hangtod sa hangtod ang kahawod ni Quiboloy, nga gipasikad sa iyang pangangkon nga gitudlo sa Ginoo nga maoy tagiya sa uniberso. Mga lagda sa katarung ug kaangayan maoy nagtakda nga moabot ang adlaw sa panudya.

Pero way nagpaabot nga labihan kapaspas sa iyang paghagsa. Kay gawas nga naghilas-hilas pagduwa uban sa mga higante, nangahas pa g’yud siya sa pagpusta. Sa sayop nga higante. Nga natangtang na sa gahom ug wa nay influencia. Gihambat sab niya ang laing higante. Nga maoy bag-ong hawod. Ug busa makahimo pagbalibag niya sa kaalaotan sa way kinutobang minatay ug kagot sa bag-ang.