Mas dinaliang panginahanglan

₱880 milyones ang giandam nga budget para sa bag-ong Kapitolyo sa Sugbo nga gitakdang tukuron sa bukid sa Balamban: ₱500 milyones ang giaprobahan sa Cebu Provincial Board; ₱200 milyones ang naapil sa 2022 national budget; ₱100 milyones gikan ni Senador Sonny Angara ug ₱80 milyones gikan ni Senador Francis Tolentino. Kaliboan ug usa ka mas dinalian ug mas importante nga mga panginahanglan ang malista sa mga Sugbuanon kon hatagan lang og higayon sa pagsugyot unsay gastohan sa ilang buhis. Kay sa pagtumpag og bukid aron pabahaan og minilyon ka pesos. Sa di pa ang ilang girekomendar nga mas mapuslanon nga gastohan sa kuwarta sa kinadatoan nga probinsiya sa Pilipinas, ang nagpakabana nga mga Sugbuanon dunay gipasukip nga duha ka proyekto nga di angayng ipatuman: Ang paggasto og usa ka bilyon ka pesos aron itukod og “world-class” nga Cebu International Convention Center (CICC) nga nahimong evacuation center sa Mandaue City; ug Ang paggasto og ₱146 milyones sa pagpalit ug sa pag-abuno sa 25 ka ektarya nga Balili property kay dunay bahin nga na-ilawom sa dagat sa sa Tinaan, Naga City. Isunod nato ang mga sugyot sa labing daghan nga nisanong sa among pamalihog pagsusi unsay labing gikinahanglan sa mga Sugbuanon: Pagtukod og dugang mga ospital sa lagyo nga kalungsoran; Pagpamalit og dugang tambal ug kahimanan sa provincial hospitals aron nga di i-diretso og pasa ang mga pasyente ngadto sa Vicente Sotto Memorial Medical Center; ug Direktang pag-hire (di pag-outsource) og dugang doktor, nurses, ug ubang healthcare workers ug paghatag nila og saktong suholan ug mga benepisyo. Di mapaigo sa atong luna kon ilista ang tanan nilang sugyot. Pero angayng paminawon sa Kapitolyo sa Sugbo ang ilang hangyo nga unahon paggamit ang katigayonan sa probinsiya aron matangtang ang labing dako natong kauwawan: Sugbo ang giila nga usa sa labing daghan og mga pamilya nga nag-ilaid sa grabeng kakabos ug mal nutrisyon. Ang pagpamugos sa paglugos sa kinaiyahan aron pagtukod sa mas halangdon nga Kapitolyo sa Sugbo mao ang labing uwahi nga timaan ngano nga napasagdan ang labing batakan nga mga panginahanglan sa mga Sugbuanon sa pagkaon, tubig, kahimsog, pinuy-anan, edukasyon, ug panginabuhi.