Raket sa Oslob
Dunay problema ang turismo sa Oslob sa habagatang Sugbo. Dakong haligi sa industriya sa turismo sa Sugbo nireklamo nga gibinuangan ang sistema sa pag-atiman sa mga turista nga manan-aw sa mga tuki (whale shark) sa kadagatan sa Tan-awan, Oslob.
Maayong balita nga nibalik na og dagsa ang lokal ug langyaw nga mga turista. Pero gipasanginlan ang mga tagduma sa turismo sa Oslob nga gipalabi ang mga turista sa South Korea. Matod niya mga Koreano ra ang gitugotan nga makakita sa mga tuki sugod sa alas-6 hangtod sa alas-8 sa buntag.
Nipasabot siya nga di ni maayong balita para sa turismo sa Sugbo. Kay daghang mga turista gikan sa ubang mga isla sa Pilipinas ug ubang kanasuran sa kalibotan nga ang pagtan-aw sa mga tuki maoy usa sa mga tuyo sa pag-anhi sa Sugbo.
Tungod sa ilang nabantayan nga di makiangayon nga sistema sa pagkuha sa limitado nga slots sa pagtanaw sa mga tuki, niingon siya nga nagkadaghan ang lokal ug langyaw nga mga turista nga nilaktaw sa Sugbo ug nipili sa Bohol, Palawan, Boracay, ug ubang mga destinasyon.
Dihang gisibya ning kasayuran sa akong programang “Baruganan” sa YouTube, pipila ka travel agencies nisumbong nga duna silay mga turista sa South Korea nga nihangyo nga moagi sila sa “fast track”, pasabot nga di mosubay sa naandan nga waitlist.
Dihang nangutana kinsay nahibaw-an sa “fast track,” gitug-anan sa mga kliyente nga gikan sa social media. Nikumpisal ang mga ahente nga wa silang kahibawo unsaon pagpanlaktod aron masegurong mas unang makakita sa mga tuki ang ilang mga suki.
Opisyal sa Oslob nga nihangyo nga di magpaila maoy nipalili namo unsay “fast track:”
• Dunay online booking system nga lahi sa nahibaw-an ug gigamit sa kasagaran sa travel agencies sa Sugbo;
• Ang alternatibong booking system nga giingong eksklusibo sa mga Koreano naggamit sa Facebook Messenger;
• Doble ang bayad aron mas unang makakita sa mga tuki, ₱1,000 kada turista imbes sa naandan nga ₱500;
• Ipaagi ang bayad sa GCash ug ubang online payment platforms; pero
• Wa na siyang kahibawo pila ang gibutang sa opisyal nga resibo sa munisipyo ug kon pila ang nitipas sa pribadong mga bolsa.