Pinas, US mopalapad sa ‘defense alliance’

SI PRESIDENTE Barack Obama ug Presidente Benigno Aquino nagkahiusa nga palapdan ang “defense ties” sa duha ka nasud atol sa gihimong bilateral meeting sa AsiaPacific Economic Cooperation (APEC) Summit dinhi sa nasud.

Gitumbok ni Presidente Aquino nga ang defense ug security alliance sa duha ka nasud milungtad na ug sobra sa 60 ka tuig gani nahimo kining usa ka lig-on nga pundasyon sa kahimtang sa kahusay ug kalinaw sa rehiyong Asia Pacific.

Mapasalamaton ang Pilipinas ngadto sa Estados Unidos sa suporta nga gihatag niini aron mapatigbabaw gayud ang “rule of law” sa isyu sa West Philippine Sea (South China Sea) ug ilabi na sa suporta niini sa gihimo sa Pilipinas nga “friendly, durable and rules-based settlement mechanism.”

Si Presidente Aquino ug Presidente Obama naghisgut-hisgut mahitungod sa maritime security lakip na ang maritime disputes sa rehiyon aron padayon nga mapatunhay ang respeto sa international law.

Si Presidente Aquino namulong atol sa maong bilateral meeting nga padayong ipatigbabaw ang “freedom of navigation” diha sa West Philippine Sea subay sa balaod nga gilatid sa international law.

Gitumbok nga “great allies” ang Pilipinas ug Estados Unidos ug matud pa ni Presidente Obama mapasalamton siya sa ilang panagtambayayong pagbantay sa seguridad sa duha ka nasud sa gihimong “Balikatan exercise” ug pag respeto sa bililhong panaghigalaay niini.

Dugang ni Presidente Obama nga ang Estados Unidos mo palapad pa sa ilang maritime assistance sa Pilipinas ngadto na sa "record levels" lakip niini ang paghatag sa US ug duha ka bag-ong barko.

Sa ilang pagtuki sa gihimong reclamation ug construction diha sa gilalisan nga West Philippine Sea, namahayag si Presidente Obama nga ang Estados Unidos andam kanunay nga mo suporta sa gihimo ni Presidente Aquino nga pagsang-at ngadto sa UN Convention on the Law of the Sea aron makab-ot ang malinawon nga sulbad sa kasamtangang pananbingkil sa duha ka nasud nga China ug Pilipinas.