Comelec, midasig sa publiko sa pagsalmot sa ilang ‘ Sumbong Ko’ campaign

GIDASIG sa Commission on Elections ( COMELEC) ang publiko o netizens sa pagsumbong sa ilang buhatan sa mga kandidatong makitaan nila og pagpanglapas karong pormal nang nagsugod ang campaign period alang sa midagan sa nasudnong posisyon.

Sa iyang post sa twitter account, gidasig sa tigpamaba sa COMELEC si Atty. James Jimenez ang publiko sa pagpadala og mga hulagway sa mga posters o campaign materials sa mga kandidato nga wala sa sakto o sa gitakdang lugar sa komisyon.

Gamit ang hashtag nga “SumbongKo” ang mga netizens gidasig sa pagkuha og hulagway sa mga posters sa mga kandidato nga wala sa common poster areas.

Partikular na ang mga posters nga naa sa mga kakahoyan, poste sa suga, poste sa kuryente ug nagbitay sa mga kable sa kuryente.

Niadtong 2013 elections, nahimong epektibo ang “# SumbongKo” campaign sa Comelec tungod kay aktibo man ang mga netizens sa pag- tweet sa mga campaign posters nga nakabutang sa mga bawal nga lugar.