CSC nipahinumdom sa mga kawani sa gobyerno sa pagsumiter sa SALN

NAGPAHINUMDOM ang Civil Service Commission ( CSC) sa mga kawani ug opisyal sa gobyerno sa pagsumiter sa ilang Statement of Assets, Liabilities and Networth ( SALN) alang sa tuig 2015.

Kini segun sa Akta Republika 6713 o gitawag nga Code of Conduct and Ethical Standards for Public Officials and Employees. Matud pa sa CSC nga kinahanglang isumiter sa saktong oras ang SALN sa mga kawani ug opisyal sa gobyerno sa dili pa ang gitakdang deadline sa Abril 30, 2016 aron dili mapahamtangan og silot.

Ang SALN deklarasyon sa assets o kabtangan ( lote, balay, sakyanan ug uban pa) ug liabilities o utang ( loans, debts ug uban pa) apil na sa business ug financial interests sa kawani o opisyal, iyang bana o asawa o wala pa naminyo nga anak nga ubos sa 18 anyos ang edad nga nagpuyo pa kauban sa iyang ginikanan sa balay.

Ang CSC nitambag sa paggamit sa SALN Form revised 2015 pursuant to CSC Resolution No. 1500088, nga gi- proklamar niadtong Enero 23, 2015 nga nanginahanglan na sa mga mosang- at niini sa paglakip sa saktong lokasyon sa ilang real properties.

Ang maong form mahimong ma- download gikan sa CSC website nga csc. gov. ph.

Nipahimangno usab ang CSC nga tungod kay panumpaan man ang SALN, ang bisan unsang sayop o kulang sa d e k l a r a s y o n , makonsiderar nga ‘ lying under oath’. Ang mga kawani ug opisyal sa gobyerno mahimong mosubay sa CSC Memorandum Circular No. 3, s. 2015 alang sa kompletong listahan sa repositoryong ahensya alang sa SALNs.

Ang mapakyas sa pagsumiter sa SALN sa gitakdang deadline usa ka paglapas sa Section 8 sa Akta Republika 6713 nga may silot nga 1 hangtud 6 ka buwan nga suspensiyon alang sa 1st offense ug pagkatangtang sa serbisyo alang sa 2nd offense.

Cebu City Children’s Park ( Cebu City PIO)