Bawal ang pagbaligya ug pagpalit sa “bote- boteng” gasolina ug diesel

ANG DEPARTMENT of Energy ( DOE) istriktong mipahimangno sa publiko sa mahimong peligro sa pagbaligya ug binotelyang gasolina ug diesel nga kasagarang maoy hinungdan sa pagka kalas sa kinabuhi ug kabtangan.

Si Energy Secretary Zenaida Monsada namahayag nga ang pagbaligya sa gasolina ug diesel sulod sa mga botelya ug uban pa nga ginadiling sudlanan istriktong gibawal ubos sa kasamtangang Department Circular No. DC2003- 11- 010 ang naila nga Retail Rules.

Matud ni Monsada ang dili hustong paggamit sa liquid fuels nga mga highly combustible and inflammable products, kasagaran maoy hinungdan sa sunog ug mga balatian nga makuha sa paghanggab sa “hazardous fumes” ug ang mahimong dautang epekto niini sa kalikopan.

Aron mawagtang ang "bote- bote" scheme, ang DOE miawhag sa katawhan ilabi na sa mga motorista nga adto lamang mopalit sa authorized and formal gas stations ug dili sa mga namaligya sa binotelyang gasoline.

Ang DOE miawhag usab sa mga local government units nga ipatuman ug bantayan ang seguridad sa mga kunsumidor pinaagi sa pag implementar sa balaod sa ginadili nga pagbaligya sa binotelyang" violative liquid fuels" sa ilang mga lugar.

Angayan usab nga susihon sa local government units kung aduna may illegal nga namaligya niini, ipatuman ang balaod, sikopon ug kumpiskahon ang mga binotelyang baligya.

Awhag sa DOE kung adunay nahibal- ang “unauthorized selling of petroleum products,” mahimo nga ipahibalo sa pinakaduol nga fire station sa Bureau of Fire Protection sa inyong mga lugar. Mahimo usab nga ipahibalo sa mga DOE offices pinaagi sa mga mosunod nga numero: Oil Industry Management Bureau ( 02) 840- 2130; Luzon Field Office ( 075) 656- 0114; Visayas Field Office ( 032) 253- 3459; Mindanao Field Office ( 082) 221- 0778.