Walay ‘go signal’ alang sa firing squad kang OFW Mary Jane Veloso

The Mindanao Examiner Regional Newspaper - - News - (Elvira C. Bongosia)

CEBU - Gitataw sa Malakanyang nga walay gihatag nga go signal si Presidente Rodrigo Duterte kang Indonesian President Joko Widodo nga ipadayon na ang firing squad kang convicted drug trafficker Mary Jane Veloso

Kahinumdoman nga si Veloso napahamtangan og silot nga kamatayon sa Indonesia human siya masakpi nga nagpayuhot og 2.6 kilo sa heroin niadtong 2010.

Matud pa ni Presidential Spokesman Ernesto Abella, walay gihimong pahayag ang presidente sa dihang nipahigayon kini og working visit sa Indonesia niadtong niaging semana.

Pasabot pa ni Abella, miingon lamang si Presidente Duterte kang Widodo nga sundon ang ilang gipatuman nga balaod ug dili siya manghilabot niini.

Sa pagkakaron, gipaabot pa sa Department of Foreign Affairs ang tubag sa embahada sa Pilipias sa Indonesia kalabot sa gipadala nilang clarification sa kaso ni Veloso.

Kini human nagpadala dayon ang gobyerno og clarification sa Indonesia human migawas ang balita sa Jakarta Post nga gihatagan na ni Duterte og go signal si Widodo aron bitayon na si Veloso.

Giingong mitawag na ang embahada sa Pilipinas sa ilang counterpart sa Indonesia aron klarohon ang maong statement.

Padayon pa usab nga gipaabot sa gobyerno ang mas daghan ug mas ligon nga ebidensiya sa kaso ni Veloso aron makumbinsir ang Indonesian government nga hatagan og clemency ang Pinay overseas Filipino Worker.

Mao nga mahinungdanon ang testimonya ni Veloso batok sa iyang mga recruiter nga sila Maria Kristina Sergio ug Julius Lacanilao aron mapagaan ang iyang kaso.

Newspapers in Tagalog

Newspapers from Philippines

© PressReader. All rights reserved.