Deployment ban sa Libya, gilibkas na

CEBU - Gilibkas na ang deployment ban sa mga Overseas Filipino Workers (OFW) nga may balidong kontrata nga nagplanong mobalik og trabaho sa Libya.

Base kini sa gipagawas sa Philippine Overseas Employment Administration (POEA) Governing Board Resolution No. 16 nga naglibkas sa deployment ban sa mga mobalik nga OFW sa Libya human gipaubos ang Crisis Alert Level 4 ngadto na sa Alert Level 2 (restriction phase).

Kini nagpasabot nga tugotan lamang ang pagdeploy og balik sa Libya ang mga trabahanteng Pinoy nga adunay balidong kontrata diin kinahanglang isumiter sa mga nahisgotang OFW ang mga dokumentong gitakda sa Embahada sa Pilipinas sa Tripoli.

Ang maong mga dokumento mao ang kopya sa ilang kasamtangang kontrata; sertipikasyon sa suholan ug benepisyo sa OFW; sulat gikan sa ilang employer nga nihangyong pabalikon ang OFW; garantiya nga luwas ug adunay seguridad gikan sa sertipikasyon sa kompanya; medical ug life insurance coverage; ug garantiya nga dali silang mapapaule base sa gisumiteng contingency plan.

Apan matud pa ni Department of Labor and Employment (DOLE) Sec. Silvestre Bello III nga mao usab ang pangulo sa POEA Governing Board, magpabilin pa gihapon ang deployment ban alang sa mga bag-ong OFWS hangtud walay gihatag nga pagtugot.

Gisuspenso sa POEA Governing Board ang pagproseso ug pag-deploy sa mga OFW paingon sa Libya niadtong Mayo 30, 2014 tungod sa kagubot sa politika sa maong lugar.

Niadtong Hunyo 13, 2014, nagpagawas ang POEA Governing Board sa Resolution No. 9 diin may pipila ka skills categories sa trabahanteng Pinoy ang gitugotang i-proseso ug ideploy pabalik sa Libya. Ug niadtong Hulyo 22, 2014, ang POEA pinaagi sa GBR No. 17 gidugangan ang skills category sa mga trabahanteng Pinoy nga gitugotang mobalik sa Libya.

Matud pa ni Bello nga niadtong Agosto 18, 2016, nipahigayon ang Department of Foreign Affairs (DFA) og pagbisita sa mga lugar sa Libya aron masayran ang kinatibukang sitwasyon sa maong nasod.