SUPPORT PEACE IN MINDANAO

Mga katawhan gipahimangno-an nga mag-amping batok sa Dengue

DIPOLOG CITY - Subli karong nagapahimangno ang kagamhanang lokal ning siyudad pinaagi sa lokal nga buhatan sa City Health Office ngadto sa tanang mga katawhan nga magbantay batok sa Dengue.

Kining maong pahimangno ang giluwatan nunot sa sigeng pag-ulan nga atong nasinati diin mao kini ang panahon sa pagdaghan sa lamok. Partikular nga gipahimangno-an mao kadtong mga ginikanan nga aduna pa’y mga gamay nga kabataan, ilabi na gayud kadtong atua nagpuyo sa mga kabaranggayan.

Sigun sa gabay nga giluwatan sa Department of Health, nga atong sundon ang programang “5S Diskarte kontra Dengue” pinaagi sa pagpabiling limpiyo sa palibot dinha sa atong tagsa-tagsa ka panimalay, uban na sa pagpang-yabo sa mga napondong tubig nga nakatambak nga container, lata ug botelya, sa pagdangop dayon sa mga ospital o health centers alang sa pagpakonsulta, ilabi na kon makabantay kita sa pipila ka mga sintomas sa Dengue pinaagi sa paghilanat, pagtugot sa mga “fogging o misting” dinha sa mga dapit nga gituho-ang itloganan sa mga lamok, pagsuot sa mga “sweaters ug pajamas” ilabi na sa mga kabataan aron malikayan ang pagpa-ak sa lamok, ug sa pag-inom sa daghang tubig aron malikayan usab ang “dehydration” o pagka-mad-an sa tubig ang atong lawas.

Ang Dengue maoy usa ka makuyaw nga sakit dala sa lamok, alang kanatong tanan, ug ilabi na gayud sa mga kabataan.

Sigun sa atong madunggan gikan sa mga balita, nga aduna na’y pipila ka mga dapit dinhi sa nasud ang nagdeklarar na og Dengue Outbreak, diin ning kasamtangan, dinhi sa atong lalawigan,aduna na’y dul-an sa upat ka gatos ang natakboyan sa Dengue.

Subay ning maong kalamboan, hugtanon karong naga-pahimangno ang buhatan sa City Health alang sa hugtanong pag-amping aron makalikay kita gikan sa Dengue. (AFB)