The Mindanao Examiner Regional Newspaper
Fire suppression training sa Zanorte
DIPOLOG CITY - Kapin kon kulang 60 ka mga piniling kawani sa Kagamhanang-probinsyal sa Zamboanga del Norte, partikularmente mga watchman sa kapitolyo, Provincial Governor’s Office, Provincial General
Services Office ug Zamboang del Norte Medical Center ang gipailalom, sa usa-ka adlawng fire suppression training.
Ang nasangpit nga training gipahigayon sa Provincial Evacuation Center nga nahimutang sa Barangay Turno, ning Dakbayan sa Dipolog. Ang mga resource persons nagagikan sa Bureau of Fire Protection nga gipanguluhan ni SF03 Jose Vincent Jasme, FO3 Mhilter Edombingo, FO2 Godfrey Manriquez, FO2 Jan Glen Mark Calago, FO3 John Michael Galeos, FO3 Paul Eric Llorente, ug FO1 Van Jason Crisostomo.
Sa mensahe ni Governor Rosalina “Nene” Jalosjos nga girepresentahan ni Mr. Norman Alegarbes, iyang gipasalamatan ang Bureau of Fire Protection sa pagpahigayon sa maong training sa mga watchman sa nagkalain-laing buhatan sa Kagamhanag-probinsyal.
Sumala pa ni Governor Jalosjos, dako kaayo kinig kapuslanan, sanglit kini mang mga tawhana ang anaa sa ilang assigned post 24-7, ilabi na panahon sa kagabhion, nga pinaagi sa maong training, ilang masayran ang fire exit sa lugar, floor plan ug ang nagkalain-laing matang sa fire extinguisher ug tukmang pag-gamit niini panahon sa sunog.
Gipasalamatan ug giawhag usab ni Governor Jalosjos ang mga partisipantes nga seryosohon ang maong training, aron tukma ang ilang pagahimoong pagpakgang sa pagkaylap sa kalayo, kon ugaling mahitabo man ang sunog. (AT Ruda, Jeffrey Lacay)