Umnotho namabhizinisi kuyadunguzela
Igciwane leCovid-19 lifike nobhubhane olungakaze lubonakale emhlabeni kulezi zinsuku. Okuhluke kakhulu ngalo ukuthi lishaya kwasani, abadla izambane likapondo nabahlwempu ngendlela efanayo. Imiphumela ukuthi sekutheleleke izinkulungwane ngezinkulungwane emazweni ahlukene athuthukile kakhulu ngezomnotho okubalwa iChina, i-United States of America, i-United Kingdom, iGermany, i-Italy, iFrance, iSouth Korea, iPortugal, iCanada namanye amazwe athuthuke kakhulu.
Okunye okubalulwayo ngokubhebhetheka kwaleli gciwane emazweni amaningi athuthukile, ukuthi abazange basheshe bathathe izinyathelo ezinqala ukunqanda ukubhebhetheka kwalo.
Kungakho-ke uHulumeni waseNingizimu Afrika uthathe isinqumo sokuthi izwe kuthiwe selifakwe ngaphansi kweSimonhlekelele Kuzwelonke (State of National Disaster) okuphinde kwengezwa ngokuthi kuthiwe selizofakwa ngaphansi kweMvalelwakhaya Kuzwelonke (National Lockdown) izinsuku ezingama-21, amasonto amathathu, lapho kuzovalwa izinto eziningi ukuze abantu banciphise ukuhlangana bebaningi ndawonye ngenhloso yokunciphisa ukubhebhetheka kwaleli gciwane.
Kungakho-ke kwaqalwa ngokuthi kuncishiswe isikhathi abantu abangathenga ngaso utshwala kwaphinde kwathiwa bungadayiswa ngesikhathi seMvalelwakhaya Kuzwelonke. Isizathu esisobala sokuvalwa kotshwala ukuthi kulula ukuthi abantu baphule imithetho nemigomo yangalesi sikhathi uma sebeqisile ngasotshwaleni futhi abantu bayathanda ukuphathaphatha nokuthintathinta yonke into nokusondela kuwo wonke uma sebephuzile.
Kubuye kwashaywa nemigomo yokuthi kuncishiswe izimoto nokunye okuthutha abantu ukuze kunciphe ukuhamba kwabo besuka ezindaweni ezinegciwane kakhulu befudukela lapho lingakagcwali kakhulu. Kungakho nezindawo eziningi zokusebenza nezizinda zemfundo kuvaliwe ukuze igciwane lingabhebhethi entsheni.
Ezweni lonke abantu bese begijimela ezitolo beyothenga izimpahla ngendlela eyihaba abacabanga ukuthi zingase ziphele ngesikhathi seMvalelwakhaya Kuzwelonke. Okumangazayo ukuthi kungani abezinhlanga ezithile bebegijimela ukuthenga amaphepha asetshenziswa ezindlini zangasese. Bebebonakala beqhuba izinqola ezitolo ebezigcwele la maphepha.
Okunye abebekuthenga kakhulu imithi nezindwangwana zokuzesula izandla lokhu okukhuthazwa umphakathi ukuthi ukusebenzise ngaso sonke isikhathi ukugcina izandla nakho konke kuhlanzekile.
UHulumeni ube esephakamisa imigomo enqala ukunciphisa lokhu kuthenga ngehaba ezitolo. Kuleyo migomo kukhona nendlela okuzojeziswa ngayo labo abazozama ukusebenzisa lesi sikhathi ukunyusa amanani ezimpahla ngoba bexhaphaza ukwentuleka kwazo ngalesi sikhathi.
Ngebhadi elikhulu, lesi simo esimazonzo ngeCovid-19 sizowuhlukumeza kakhulu umnotho womhlaba wonke nowalapha eNingizimu Afrika. Ukuvalwa kwezinto kusho ukuthi abamabhizinisi abaningi bazohlukumezeka kakhulu ngoba bancane kakhulu abathengi. Abamabhizinisi abazohlukumezeka kakhulu yilabo abasembonini yezokungcebeleka, abezemidlalo, abadayisa ngophuzo oludakayo, abezindawo zokuvakasha, abezokuthutha neminye imikhakha eminingi.
Imboni yezindiza, amabhasi, izitimela nokunye kushayeke kakhulu ngoba kuthiwe abezindiza abamane base bevala imizila eminingi.
Lokhu kungenxa yokuthi abagibeli abaningi sebemane bayeka ukusebenzisa izindiza ngoba izinhlangano eziningi zithi makuncishiswe kakhulu ukesetshenziswa kwazo ngoba kuthiwa kulula ukuthola leli gciwane kulabo abahamba ngezithuthi zomphakathi.
Lokhu kuzodonsela kubantu abaningi ukuthi balahlekelwe imisebenzi nokuthi iningi lalawa mabhizinisi azithole evalwa. Abantu abazithola bevikeleke kakhulu yilabo abaqashwe uHulumeni ngoba bayazi ukuthi uzokwazi ukubaholela ngesikhathi seNational Lockdown.
Labo abasebenzela amabhizinisi azimele bazithola bebambe umoya ngoba abanye babaqashi bazongakwazi ukubaholela bengasebenzanga. Abanye abazoshayeka kakhulu yilabo abaziqashe bona, abazisebenzayo ngoba uma bengasebenzi ngalesi sikhathi kusho ukuthi ngeke bakwazi ukubeka ukudla etafuleni. Imigomo eminingi ebekiwe ithi kuzoqhubeka ukusebenza kakhulu leyo mikhakha esondelene nezempilo nokusondelene nokubhekana nalolu bhubhane. Abamakhaza bazobe bevulile nabo ngoba ukufa akumemezeli kufika noma kunjani.
Kuthiwa izisebenzi nalabo abavumelekile ukusebenza ngalesi sikhathi kumele babe nezimvume okuyomele bahlale beziphethe ezishoyo ukuthi bakhona kule mikhakha okuthiwa ngebaluleke kakhulu okubalwa odokotela, abahlengikazi nabanye abasebenza kwezempilo.
Kanti-ke nalabo abangabangcwabi bavumelekile ukusebenza ngalesi sikhathi. Umnotho waseNingizimu Afrika ukhala ezimathonsi njengoba bekuvele sekuthiwa ngeke ukhule kulo nyaka wezi-2020. Kumanje sekuthiwa ungase wehle ngezinga elingaphezulu kwama-0.2%. Inkinga enkulu ukuthi ukukhula kwabantu kuleli kungaphezulu kakhulu, bakhula ngama-2.4% uma kuqhathaniswa nokwehla komnotho ngesikhathi esifanayo.
Alingalahlwa ithemba kulesi sikhathi sezinsuku ezingama-21 ekutheni sizosiza ukunciphisa ukubhebhetheka kwaleli gciwane. Yonke imigomo ebekiwe mayilandelwe, uma uHulumeni ethi kungahlangani abantu abangaphezulu kwe-100 endaweni eyodwa ngesikhathi esisodwa, kuhlonishwe lokho kungayiwa emasontweni ngenkani ngoba kuthiwa imithetho yezwe ayingaphezu kwemithetho kaNkulunkulu. USimakade ngeke avikele ozenzile.