Unyaka oqala ngezivuvaba
Nanko-ke unyaka wezi
2020, uyoba semlandweni waseNingizimu Afrika, njengowenhlupheko kubantu bakhona. Isimo somnotho sehle kakhulu ngokwezibalo ezikhishwe ngenyanga edlule. Lokhu kudalwe ukuhamba kwamandla kagesi okudlange ngonyaka odlule usuyophela, kwakapakela nakulo nyaka. Lihlabe lephukela iva ngokuhamba kwamandla kagesi njengoba namanje lingakabanguleki leli va. Kusabatshazwa ukwehla komnotho, kwavele kwaqubuka igciwane elalibatshazwa eChina, kusukela ngoZibandlela nyakenye iCoronavirus elidale isifo iCOVID-19.
Ukusabalala kwaleli gciwane kufana nokuthela amanzi abilayo enxebeni elibhibhayo. Kunomthelela omubi ngendlela ebabazekayo ukusabalala kwaleli gciwane, ngoba uma selibe yisifo, asibe siselapheka yikho sekuphangalale abantu abavile ezi4 000, umhlaba wonke.
Yisifo lesi esithinta yonke imikhakha yempilo yingakho sibona nabaholi bezenkolo besukuma, bekhwishiza, ngokwethemba ukuthi ukubhebhetheka kwaleli gciwane, kunganqandeka uma kuqiniswa emikhulekweni. Uma kuvalwa izikhungo ezibalulekile zikaHulumeni neminyango ebalulekile komasipala, lokhu kukhombisa khona ukuthi amanzi asengene endlini. Kukhala osomabhizinisi abangasayenzi inzuzo nokuzoholela ekutheni badilize abasizi nezisebenzi zabo. Lukhulu luyeza luyanyelela, njengoba kubaholi umhlaba wonke jikelele kunochwepheshe bezifo abangakaqhamuki nezinto ezinika ithemba. Kukhulunywa ngezinto isizwe okufanele sizenze ukuvikela ukubhebhetheka kwesifo hhayi ukuthi ikhambi selisemnyango. Igciwane leli abanye abantu bakuleli bebelithatha njengomdlalo, kodwa imikhankaso nezinhlelo zokuqwashisa ngalo sesenze babheka ngamanye amehlo.
Amazwe omhlaba awasakhulumi ngezindlela ezingcono zokuhwebelana kodwa sekuhlanganwa ngokuthi kungenziwa njani ukuphephisa impilo yabantu esengcupheni kuwo wonke amagumbi omhlaba. Ukubhebhetheka kwaleli gciwane sekwenze abanye abantu babona ikusasa liluvindi ngoba akwaziwa ukuthi isisombululo siyothalakala nini futhi kanjani. Yigciwane leli eselihlanganise izitha nabangani emhlabeni jikelele ngokwesaba. Impilo imile esikhundleni sokuthi iqhubeke.