Lang herstelpad lê vir man voor ná ongeluk
MBOMBELA - ’n Lang pad van herstel lê vir Estian Liversage (25) voor na hy onlangs in ’n ernstige motorongeluk op die Schoemanskloof-pad sy broer en meisie aan die dood afgestaan het.
Estian was op Sondag 10 Oktober op pad na Johannesburg saam met sy meisie, Johesta Otto (27), en sy broer, Zander
(23), toe hulle deur ’n ander motor reg van voor getref is. Albei Zander en Johesta is in die ongeluk dood.
Sy ma, Linda, het aan Laevelder gesê hy sal teen die naweek uit die hospitaal ontslaan word indien sy behandeling glad verloop.
Hy het op Woensdag 13 Oktober ’n operasie aan sy knie ondergaan en moet op Woensdag 20 Oktober ’n heupoperasie kry.
“Estian gaan ’n lang rehabilitasieproses moet ondergaan. Wanneer hy ontslaan word, sal hy vir eers in ’n rolstoel moet wees omdat sy enkels vergruis is. Sy oppervlakkige wonde soos kneusplekke en snye word mooi gesond,” het
Linda gesê.
Estian het verskeie beserings in die ongeluk opgedoen, onder meer breekplekke in sy voete, knieë, linkerarm, ribbebene en heup, asook ’n besering in sy long.
Sy het gesê dit gaan op ’n emosionele vlak nie goed met hom nie, en dat hy sukkel om sy broer en meisie se dood te verwerk.
Volgens Linda word Johesta op Donderdag 21 Oktober in Louis Trichardt begrawe. Zander is op Woensdag 20 Oktober veras.
“’n Diens vir Zander sal gehou word sodra Estian uit die hospitaal ontslaan is. Hy is reeds hartseer omdat hy nie Johesta se begrafnis sal kan bywoon nie.”
Intussen het Linda se dogter, Bianka, ’n BackaBuddy-veldtog begin om fondse in te samel. Die fondse sal onder meer gebruik word om Johesta se begrafniskostes te dek asook vir
Estian se rehabilitasie. Weldoeners en gemeenskapslede het teen Dinsdagmiddag 19 Oktober meer as R118 000 geskenk.
Die drie jongmense was op pad na Johannesburg vir werk toe die ongeluk op die Schoemanskloof-pad ná Patatanek plaasgevind het.
’n Motoris in ’n Toyota RAV4, wat in die rigting van Mbombela gery het, het na bewering verskeie voertuie op een slag probeer verbysteek, en dít glo oor ’n soliede lyn. ’n Vragmotor het na bewering van voor gekom en die motoris het uitgeswaai. Die motoris het die motor met Estian, Zander en Johesta reg van voor getref.
’n Saak van strafbare manslag word ondersoek. Volgens Linda het die drie se persoonlike besittings, soos selfone en gereedskap, ter waarde van sowat
R160 000, van die toneel af verdwyn en is dit tot dusver nog nie gevind nie.