VF Plus se 2021-Manifes: Die verval kan gestop word
Die VF Plus se manifes vir die plaaslike regeringsverkiesing op 1 November is ’n boodskap van hoop; ’n boodskap dat dit wel moontlik is om die verval van plaaslike regering in Suid-Afrika te stuit en te stuur in ’n rigting wat tot voordeel van almal in SuidAfrika sal wees.
Dit word duidelik in die VF Plus se tienpuntplan, wat die kern van sy manifes vir 2021 vorm, uitgespel.
Die verval van dorpe en stede is duidelik sigbaar. Inwoners word oorbelas en ontvang nie waarde vir geld nie.
Hierdie verval belemmer ekonomiese groei en werkskepping. Geen sakeonderneming kan floreer terwyl daar gebrekkige infrastruktuur en dienslewering is nie.
Die ANC het bewys dat hy nie kan regeer nie. Dit is ook bewys dat waar ’n politieke party alleen regeer en te veel mag het, dit tot magsmisbruik, politiekery, korrupsie en verkeerde prioriteite lei.
Die oorsake van korrupsie, wanbestuur, beurtkrag, waterbesoedeling en swak dienslewering, kan voor die deur van die
ANC se beleidsrigting geplaas word.
Die VF Plus staan op teen hierdie beleid en bied hoop vir ’n beter toekoms met gelyke geleenthede vir almal.
Die party se span parlementslede, provinsiale wetgewerlede, munisipale raadslede, personeel, aktiviste en vrywilligers het bewys dat hulle die gemeenskap dien, effektiewe opposisie bied, probleme oplos en kan regeer daar waar die VF Plus tans deel van veelpartyregerings is.
Die VF Plus se 2021-manifes verduidelik die konkrete oplossings wat die party se beleid bied, wat dienslewering en munisipale bestuur sal verbeter.
Vandag se Manifes 2021-bekendstelling het hibried plaasgevind met lede regoor die land wat ook via ’n virtuele platform ingeskakel het. Dit is ook regstreeks op sosiale media uitgesaai.
VF Plus Mpumalanga se kandidate werk vir jou
Die aanloop tot die opkomende munisipale verkiesing is nie die enigste tyd wat die kandidate van VF Plus in Mpumalanga hard werk nie. Hierdie 64 gesigte is welbekend in hul gemeenskappe vir die dienste wat hulle lewer.
Hierdie kandidate is versigtig deur die VF Plus gekies en bestaan uit lede van plaaslike gemeenskappe wat uitsonderlike, selflose werk vir ander gemeenskapslede lewer.
Die VF Plus is vasbeslote om die verval in plaaslike munisipaliteite te stop. Hierdie 12 kandidate het dit hul doel gemaak om ’n beter omgewing en regering vir hul plaaslike gemeenskappe te verseker.
Hierdie promosieartikel is betaal deur die betrokke politieke party en bevat die menings van die kliënt en nie dié van die publikasie waarin dit verskyn nie.