Die matte kraak weer onder ywerige karatekas
Tot die groot verligting van ouers en karatekas eweseer, het New World Shotokan Karate vir die eertse keer in byna twee jaar weer ’n kampioenskap aangebied.
Deelnemers het met groot ywer deelgeneem en groot opwinding het op dié dag by die militêre sportsaal geheers.
Tot ’n sekere mate was daar weer ’n gevoel van normaliteit met die paviljoene gevul met ouers honger vir sport en wat die kleinspan luidkeels toegejuig het. Covid-19protokols was egter steeds van toepassing en is streng deur Bruce Macaulay toegepas.
Dit was ’n vriendskaplike kampioenskap waartydens net shotokan-styl dojos deelgeneem het, en NWS Skukuza, NWS Hazyview, NWS Witrivier, NWS
Nelspruit en SKISA (Shotokan Karate International - SA) was goed verteenwoordig.
Sensei Piet Venter, wat weer met trots langs die karatematte kon staan, het gesê dit was fantasties om weer te kon deelneem. “NTT Toyota Witrivier het menige deelnemers se dag opgehelder deur die pragtige medaljes wat hulle geborg het. Die noodhulpdienste is deur
ER24 Lowveld waargeneem. Ons wil hulle bedank vir hul onbaatsugtige en uiters professionele diens. Die Covid-beheermaatreëls was toegepas deur Bruce, wat hom skitterend van sy taak gekwyt het,” het hy gesê.
In die dames opeafdeling was Carien de Bruyn van die Witrivier NWS dojo die kampioen in die kumite- (gevegskuns) en kata-afdelings, en in die mans opeafdeling het Philip Eloff van NWS Witrivier weggestap met ’n goue medalje vir kumite. Hugo Lusse van NWS Hazyview het die kata-afdeling gewen.
Belangstellendes kan Venter by 083 629 4475 kontak.