Visstropers vas in Marlothpark

MARLOTHPARK - Vier mans is die naweek hier aangekeer nadat hulle met streepsakke vol vis wat onwettig gevang is, betrap is.

Dié sukses teen visstropery volg nadat ’n wenk van ’n inwoner van dié dorp ontvang is, sê Carlo Cesano van die Marlothparkgemeenskapspolisiëringsforum (GPF).

Die inwoner het glo gesien hoe vier mans die streepsakke op ’n bakkie laai. Daar is aanvanklik vermoed dat hulle kabeldiewe kon wees. Cesano sê die GPF, iSecure en Field Security op die vakansiedorp het onmiddellik gereageer en die bakkie voorgekeer oomblikke nadat dit by Marlothpark se Hek 1 uitgery het.

Dit is toe dat ’n nylon-kieuvisnet en twee sakke vol vis agter op die bakkie ontdek is.

Daar was onder meer kurpers en tiervisse in die twee sakke. Dit is onwettig om kieunette te gebruik.

Die verdagtes is in hegtenis geneem en aan Jaco Minnaar, hoofveldwagter van die Nkomazi Plaaslike Owerheid, oorhandig.

“In hierdie stadium is daar nog nie duidelikheid oor waar die vis gevang is nie. Ons vermoed dit is op een van die aangrensende plase se damme, of selfs in die Krokodilrivier, gestroop,” sê Cesano.

Volgens hom bewys die deurbraak dat samewerking tussen die inwoners, die GPF, sekuriteitsmaatskappye en die veldwagters noodsaaklik is.

Cyril Ripinga, woordvoerder van die munisipaliteit, het die voorval bevestig en sê dat ’n klag by die polisie ingedien is. Hy sê dat die munisipaliteit met kommer kennis geneem het van die styging in die hoeveelheid stropery in en rondom Marlothpark. Volgens hom sal wetstoepassers moet saamwerk om die veiligheid van fauna en flora te verseker. Hy sê die visstroperyvoorval word dringend ondersoek.

Die verdagtes sal Vrydag in die Komatipoort Landdroshof verskyn.