HERSTEL van jou
Soms besef ’n mens nie dat ’n keisersnee ’n enorme buik-operasie behels nie. Wees realisties oor jou hersteltydperk.
Dit kos tyd om van ’n keiser te herstel. Gelukkig het jy nou ’n baba en dit is sekerlik die grootste aansporing en beloning om so gou moontlik beter te begin voel. Kom ons kyk hoe jy jou herstel kan bespoedig en hoe jy gaan voel in die ure, dae en weke nadat jy jou keisersnee gehad het.
’N GOEIE BEGIN
Die Johannesburgse vroedvrou Janine Nash sê optimale voeding en gesondheid is nie net tydens jou swangerskap belangrik nie – dit help ook dat jy ná die tyd beter van jou keisersnee sal herstel.
“Probeer om so gesond moontlik te wees wanneer jy die operasiesaal binnegaan. Probeer om nie die aanbevole gewig vir jou swangerskap te oorskry nie. Oorgewig vroue is geneig om meer ná ’n keisersnee te sukkel omdat hul wonde soms kan ontsteek omdat dit in ’n velvou lê, wat verhinder dat lug by die wond kom,” verduidelik Janine.
Oefening tydens swangerskap help beslis. Jy mag net nie langer as 30 minute uitasem wees nie, en jou polsslag behoort nie 140 slae per minuut te oorskry nie.
WAT JY NIE KAN DOEN NIE
• Jy mag vir ses weke nie bestuur nie. As jy voel jy kan, en jy moet, moet jy met jou versekeraar gesels, want dis moontlik dat jy nie dekking sal hê nie. • Jy mag nie oefen tot die ginekoloog
op ses weke vir jou gesê het jy mag nie. • Jy mag nie seks hê tot die ginekoloog
gesê het dis in die haak nie. • Jy mag nie swem terwyl jy nog bloei nie. Water kan jou uterus binnedring omdat jou serviks nog oop is. Oefening is noodsaaklik vir ma en baba se gesondheid, en ook vir ’n gesonde keisersnee. Janine beveel stap, swem en joga aan.
NÁ DIE OPERASIE
Die eerste belangrike ding is dat die ma wat ’n keisersnee moet kry, positief oor die ervaring bly, sê Janine. Jou emosionele houding speel ’n groot rol in jou herstel. “Die ma’s wat ’n positiewe uitkyk het, vaar altyd beter met herstel as dié wat negatief is.”
Aan die fisieke kant van dinge sê Janine jy kan maar in jou bed begin kriewel sodra jy uit die herstelkamer is. “Deur jou beenspiere saam te trek, bevorder jy bloedvloei, en dit voorkom diepaartrombose.”
Jy sal vir minstens 12 uur ná die operasie nie toegelaat word om op te staan nie.
“Sodra dié tydperk verby is, kan jy met hulp orent kom. Staan regop. Dit kan voel asof jou wond gaan oopskeur, maar dit sal nie. Wanneer jy mooi regop staan, sal die gevoel weggaan. Hoe langer jy die opstaanslag uitstel, hoe moeiliker gaan dit word,” beklemtoon Janine.
In die eerste 24 tot 48 uur ná die geboorte sal jy aangemoedig word om jou gewone swangerskapsaanvulling te drink en jy kan ook ’n tonikum soos Blackthorn Berry Elixir drink, met baie water. Dit sal help om herstel te bespoedig en ook om hardlywigheid te voorkom. Laasgenoemde ontstaan onder meer omdat ’n mens se derms effens deur die buikoperasie beïnvloed word.
Die laaste ding waarmee jy in hierdie stadium opgesaal wil wees, is hardlywigheid. Eet dus kos en vrugte met baie vesel as jy vermoed dat jy hardlywig kan raak.
HOE GAAN JY VOEL?
Sowat ’n uur ná die operasie sal jy weer gevoel in jou bene kry. In die 24 uur daarop kan jy post-operatiewe pyn ervaar. Jy kan naar wees of lighoofdig van die narkose en medikasie wat jy kry.
Ná 48 uur begin die pyn afneem en elke dag word ’n bietjie beter tot jy teen dag 10 werklik heelwat beter begin voel. • Vra jou dokter wanneer jy mag bad. Dit hang af van die metode wat gebruik is om jou wond toe te maak: steke, krammetjies, oplosbare steke of gom.
WAT JY KAN DOEN
• Stap. • Borsvoed binne ’n uur ná die operasie. Vel-tot-vel-kontak sodra dit moontlik is, word aanbeveel. • Buk en doeke ruil. • Rus en hulp vra.