PA SE TOWER) KRAG
‘n Pa se liefde en betrokkenheid in sy kleinding se lewe verryk en bou op ’n totaal ander manier en vlak as ’n ma s’n.
Pa’s is wonderlike dinge. Al druk sommiges hul neus toe as hulle poefdoeke ruil of al dink party ouer mense dat pa’s nie aan babas moet vat nie omdat hulle hulle dalk kan breek. Pa’s is nie ma’s nie – gelukkig nie. Dis juis pa’s se andersheid wat maak dat hulle ma’s so goed aanvul in die delikate taak van ouer wees vir ons kosbare klein mensies.
Ter ere van Vadersdag vier ons hieronder al ons betrokke pa’s.
PAPPAS IS ROTSVAS EN ONBREEKBAAR
Wie kan dan nou bang voel as jy veilig in pappa se arms is? Selfs net sy stem is genoeg om enige monster die skrik op die lyf te jaag! Pa’s is uitstekend daarmee om ’n atmosfeer van veiligheid en sekuriteit in ’n huis te skep, sê Craig Wilkenson, Kaapse pa, motiveringspreker en skrywer van die boek Pa–Diewerkenwondervanware vaderskap.
“Die sielkundige Sigmund Freud het gesê hy kan aan geen groter behoefte in die kinderjare dink as die beskerming van ’n vader nie. Dalk is dit omdat pa’s oor die algemeen groter en sterker is met dieper stemme, maar daar is net ’n sin van veiligheid rondom sterk manlikheid. Daarom lewer pa’s ’n baie belangrike bydrae tot die gevoel van veiligheid – emosioneel sowel as fisiek – by ’n kind,” sê Craig.
’n Studie deur die Kanadese Father Involvement Research Alliance (FIRA) het getoon dat babas met betrokke pa’s meer geneig is om emosioneel veilig te voel, selfvertroue in nuwe situasies te toon en gretig is om hul omgewing te verken.
PAPPA SE PRINSES
Sy’t haar mooiste partytjierokkie aangetrek en mamma sê sy lyk pragtig, maar by wie gaan spog sy? By pappa! Daar is eenvoudig ’n ekstra vonkel in ’n dogtertjie se oë as sy interaksie met haar pa het, reken Craig.
“’n Meisie het sekere dinge eenvoudig van haar pa af nodig en dit begin al van kleins af. Hy wys vir haar hoe ’n man behoort op te tree en het ’n reuse impak op haar selfvertroue.”