DIE VERKEERDE REDES

DINK TWEE KEER VOOR JY SPEEN OMDAT …

MA/SKOONMA/MAN/ VRIENDIN/BUURVROU DINK DIS TYD

Kritiek maak seer, veral komende van die mense naaste aan jou. Omdat bottelvoeding die norm geword het, is die meeste mense onkundig oor borsvoeding. WENKE OM KRITIEK TE VERMY OF HANTEER • Kry ’n ondersteuningsnetwerk. Gesels openlik met jou maat en kry hom aan jou kant. La Leche League het spesiale vergaderings vir ma’s wat peuters en kleuters borsvoed en bied ondersteuning op hul Facebook-blad. • Hou jou mond en jou bloesknope toe voor mense wat jou keuse nie sal respekteer nie. Leer jou ouer kind ’n kodewoord vir borsvoeding. Indien nodig kan jy reëls neerlê, soos dat hy net tuis melkies kry. • Sodra jou baba vaste kos eet, kan jy met ’n geruste hart vir neusinstekers sê julle het die speenproses begin. • Ontlont die situasie met humor.

Baseer jou besluite oor borsvoeding op jou baba se behoeftes – en jou eie – eerder as op ander se verwagtinge. Jy is die kenner wanneer dit by jou kleinding kom.

TANDE KRY

Babas byt meestal omdat hul tandvleis jeuk terwyl hulle tande kry. Tandvleis kan jou tepels geniepsig knyp, maar rig geen skade aan nie, wat jou ’n gulde geleentheid gee om die bytgewoonte betyds in die kiem te smoor. WENKE • Probeer jou bes om nie te gil nie. ’n Sensitiewe baba kan op ’n borsvoedingstaking gaan, terwyl ’n klein onnut dit as ’n lekker speletjie kan beskou om ma weer so te laat reageer. • Trek baba na jou toe eerder as van die tepel af. Die borsweefsel sal sy neus toedruk sodat hy moet los. Maak oogkontak en sê ferm: “Nee, mamma is nie vir byt nie”. • Smeer voor voedings pynstillende jel

aan sy tandvleis. • Dis vir ’n baba fisiek onmoontlik om te byt terwyl hy borsvoed. Haal hom dadelik af indien hy eerder wil speel.

N NUWE BABA OP PAD IS

Tensy jy ’n geskiedenis van vroeë kraam het, is daar geen mediese rede om jou baba nou te speen nie. Jou melk sal wel afneem en die smaak sal verander, en jou kind kan dus self besluit hy het genoeg gehad. Swangerskapshormone kan seer tepels veroorsaak en sommige ma’s kla dat hulle tydens voedings kriewelrig voel.

Om medespruite te borsvoed wat nie ’n tweeling is nie, word tandemvoeding genoem. In die eerste drie dae, terwyl die borste kolostrum produseer, behoort die nuweling eerste te drink; daarna maak dit nie saak wie wanneer aan die beurt kom nie. Jy kan die tweetjies ook tegelykertyd voed om tyd te spaar. Jou ouer kind sal jou melkproduksie help stimuleer en is ’n nuttige “borspompie” indien nodig.

MOEG/OORWELDIG/ DEPRESSIEF IS

Ma wees is intens en tydrowend, ongeag hoe jy baba kosgee. Wanneer jy gedaan is, is borsvoeding ’n gerieflike sondebok, maar dink eers mooi of spening werklik jou lewe makliker gaan maak. Dis ’n drastiese en meestal onomkeerbare stap, en in terugskouing voel ouers soms dat dit sake vererger het.

“Ek het gedink almal sal beter slaap as Annabelle (8 maande) begin bottel drink, maar die teenoorgestelde het gebeur,” vertel Mariska, ‘n ma op Facebook. “Hoewel ek en my man beurte maak met nagvoedings, moet een van ons nog opstaan. Borsvoeding was geriefliker: Ek het haar sommer in die bed getel en dan het ons al drie verder geslaap. Soms wens ek ons het vroeër besef die probleem was nageboortedepressie eerder as borsvoeding.”

Ma’s met postnatale depressie kry dikwels die welbedoelde raad om te speen. Navorsing bewys egter dat: • Borsvoedende ma’s meer en beter slaap

as dié wat bottelvoed; • Borsvoeding ’n buffer vorm tussen ’n baba en die negatiewe uitwerking van sy ma se depressie; en • Die meeste antidepressante veilig tydens

borsvoeding is.

OP ’N BORSVOEDSTAKING IS

Daar is verskeie redes waarom babas die bors tydelik weier, soos ’n toe neus of oorinfeksie, of ’n groot skrik tydens ’n voeding soos dat die huisalarm afgaan. As jou baba jonger as ’n jaar is, en/of ontsteld is oor ’n situasie, is hy waarskynlik op ’n borsvoedstaking en nie besig om hom self te speen nie. Lees hier hoe om die probleem op te los: www.llli.org/faq/strike.html.

Die versoeking is dikwels groot om permanent te speen tydens ’n borsvoedstaking. Dink egter mooi voor jy besluit.