EK WAS NIE GEREED NIE
“Ek wou Liam toelaat om self te speen,” vertel Lauren Smith op Facebook. “Kollegas en vriende se kinders het dit almal ná twee gedoen, meestal eers op drie. Toe hy ses maande oud was, is ek terug werk toe. Ek het uitgemelk en bedags het hy bottels borsmelk gekry. Ons het meestal in dieselfde bed geslaap en hy sou sommer aan my slaapklere trek en homself help. Die voedings soggens, saans en oor naweke was vir my nog so lekker. Ná 13 maande het dit stelselmatig minder geword, tot hy op 15 maande een oggend glad nie wou borsvoed nie. My hart was baie seer – dit was so ’n spesiale ervaring. Ek het nooit verwag dit sou so vinnig, of so totaal, eindig nie, maar ek is dankbaar ons het 15 maande gehad, en dat ek Liam nooit gedwing het nie. Dit was ’n heel natuurlike proses.”
AS MA LEIDING NEEM
Die meeste ma’s wil vroeër speen en dus ’n meer aktiewe rol speel. Hier is ’n paar wenke: • Geleidelik is gewoonlik beter, vir jou
baba en jou borste. • Skakel een voeding per week uit. Middagvoedings werk dikwels goed, aangesien babas meer geheg is aan hul wakkerword- en slaaptydroetine. • Pa kan baba se aandag aflei deur met voedingstye met hom te speel of gaan stap. • As jou baba jonger as ’n jaar is, moet hy verkieslik bottel drink om sy suigbehoeftes te bevredig. Daarna kan hy ’n koppie gebruik. • Raadpleeg ’n pediater of klinieksuster oor ’n geskikte formule. Gewone koeimelk moet in die eerste jaar vermy word. • Soms is dit nodig om twee treë vorentoe en een agteruit te neem. Baba word dalk siek, of is baie huilerig en onseker, of jou borste is oorvol. Hou ’n oop gemoed en wees geduldig, al duur dit langer as wat jy beplan het. Tydsberekening is belangrik. Baba sal harder teen die prikkels skop op stresvolle tye, soos met ’n trek, of wanneer hy met dagsorg begin. Skeidingsangs begin teen nege maande en kan spening ook bemoeilik.
SKIELIKE STAKING
Behalwe in noodgevalle is skielike spening nie ’n goeie plan nie. Omdat jou baba borsvoeding met liefde verbind, kan hy verwerp voel. Oorvol borste verhoog die gevaar van verstopte melkbuise, mastitis en borsabsesse – selfs al neem jy medikasie om jou melkproduksie te onderdruk. As julle skielik moet ophou, soos wanneer jy ’n mediese prosedure moet ondergaan, is ’n natuurliker benadering veiliger, vinniger, en doeltreffender. GAAN SÓ TE WERK • Melk uit wanneer jou baba sou gevoed het, maar net genoeg om jou borste gemaklik te hou. Rek die sessies gaandeweg verder uitmekaar. • Gebruik koue kompresse en koolblare
vir pyn en swelling. • Kry mediese hulp as ’n jy teer, rooiwarm knop in jou bors kry en/of grieperig voel.
Hoewel die speenproses gewigtig voel, is dit ’n enkele treetjie op jul borsvoedingsreis – ’n oomblik in jul lewenslange verhouding. Benader dit sensitief en liefdevol, doen wat vir julle werk, en koester die mooi herinneringe.