WINTERVOEDINGSTOWWE

Behalwe vir ’n gesonde, gebalanseerde dieet is dit belangrik om in die wintermaande veral op ’n paar voedingstowwe te fokus wat kan help met die voorkoming van verkoue en griep, en wat jou help om vinniger gesond te word as die kieme jou beetgekry het.

VITAMIEN A

Vitamien A word ook die anti-infeksievitamien genoem omdat dit die liggaam help om bakteriese en virusinfeksies te beveg. Voorbeelde van vitamien A-ryke kosse is lewer, eier en verrykte margarien. Die wateroplosbare voorlopers van vitamien A kom voor in donkergroen blaargroente soos spinasie, geel-oranje groente soos wortels, patats en pampoen en vrugte soos papaja, spanspek en gedroogde appelkoosrolletjies.

VITAMIEN D

Vitamien D speel ’n rol in ons immuniteit en kan help om dele van die immuunstelsel te aktiveer wat griep- en verkouevirusse kan lamlê. Die meeste van ons vitamien D word in die liggaam deur sonblootstelling gemaak. In die winter is blootstelling aan die son minder en dit kan tot ’n vitamien D-tekort lei. Julle moet in die winter dus meer kosse eet wat baie vitamien D bevat om siektes te help voorkom. Eet meer vetterige vis soos sardientjies, salm, makriel en tuna, asook vislewerolie en eier. Sommige soorte babapap en margarien is ook verryk met vitamien D.

VITAMIEN C

Vitamien C speel ’n rol in die voorkoming van infeksies en studies wys dat groot hoeveelhede daarvan veral van waarde kan wees vir mense wat onder fisieke spanning verkeer, soos marathon-atlete. Dit is dus perfek dat kosse soos sitrusvrugte en papaja wat baie vitamien C bevat, juis in die winter in seisoen is. Maak

seker jou gesin eet meer lemoene, nartjies, pomelo, koejawel, papaja, aarbeie, tamaties, soetrissie, broccoli en lewer.

VITAMIEN E

Vitamien E is nodig vir ’n gesonde immuunstelsel en kom veral voor in plantolies, koringkiem, aspersies, grondbone en margarien, neute en sade en heelgrane.

VITAMIEN B

Vitamien B is nodig vir die vorming van witbloedselle, ’n belangrike lid van die immuunstelsel. Die beste bronne is vleis, pluimvee en vis. Heelgrane, piesangs, avokado, aartappels en sonneblomsaad is ook goeie bronne.

SINK

Sink is belangrik vir ’n sterk immuunstelsel en daarom kan genoeg daarvan help om verkoue te voorkom. Goeie bronne van sink is seekos – veral oesters – vis en rooivleis, veral bees en vark. Lewer, bone, heelgrane en koringkiem is ook goeie bronne.

YSTER

Yster is belangrik vir die funksionering van sekere selle van die immuunstelsel. Die beste bronne is oesters, lewer en ander orgaanvleis, rooivleis, hoender, vis en eiergeel.

Spinasie, peulgroente en ertjies is ook goeie bronne. Ysterpotte kan ook yster voorsien, veral wanneer iets suurs soos tamatie daarin gekook word. Vitamien C-ryke kos bevorder die opname van yster.