Goeie ouers maak só
WAT IS JOU DOEL?
Jou groot doel as ouer is om jou kinders voor te berei om as onafhanklike, verantwoordelike volwassenes te funksioneer. Jy hoef nie vas te val in daaglikse krisishantering nie. Fokus eerder op wat ’n kind uit ’n situasie moet leer ten einde hom voor te berei vir die lewe as volwassene.
Een van die geheime is dat jy konsekwente grense vir jou kind moet stel, maar hom terselfdertyd die ruimte moet gee om te kan ontwikkel. Pas jou dissipline dus deurlopend toe en wees konsekwent, ongeag jou bui. Dikwels hang dissipline daarvan af of die ouer ’n goeie of ’n slegte dag gehad het. Die gevolg is dat die kind leer dat sy gedrag van sy ouer se bui afhang en dat die reël nie ter sprake is nie. Op die ou end is die ouer in ’n posisie dat sy aanmekaar “kwaai” moet wees om haar kinders sover te kry om die reëls te gehoorsaam.
As jy egter ’n reël konsekwent toepas, leer jou kind dat sy gedrag deur die reël gerig word en nie deur jou bui nie. Só leer hy self sy gedrag beheer pleks daarvan dat jy dit heeltyd vir hom moet doen.
Dit help ook om riglyne eerder positief as negatief te maak omdat jy dan vir jou kind ’n alternatief vir onaanvaarbare optrede gee. Sê dus liewer “hou jou bene stil” as “moenie so woel nie” – dan weet hy presies wat om te doen.
As jy nou reeds konsekwente grense in jou kind se lewe stel, sal hy eendag makliker in die grootmenswêreld oorleef. Grense is belangrik sodat hy kan leer wat aanvaarbare gedrag is. Dié grense moet natuurlik realisties vir jou kind se ontwikkelingsvlak wees.
Om hom te laat besef hoe belangrik hierdie grense is, kan jy hom beloon vir die regte gedrag of straf wanneer hy die grense oorsteek.
Grense moet billik en liefdevol wees. As dit onbillik of te streng is, kan dit jou kind se ontwikkeling skaad. Liefdevolle dissipline is ’n baie belangrike bestanddeel van ouerskap wat “goed genoeg” is – dit help verseker dat jou kind as ’n emosioneel standvastige, ten volle ontwikkelde persoon grootword.
WYS JOU LIEFDE
Hoe weet jou kinders dat jy hulle lief het? Die antwoord is ’n drieletter woord. Tyd.
Tyd is die een bron waarvan almal ’n gelyke deel ontvang het – anders as geld – en hoe jy jou tyd deurbring, is ’n aanduiding van jou prioriteite.
Geen geld kan ooit die plek inneem van ouerliefde en aandag nie. Kinders wat nie in hul ouerhuis liefde kry nie, is dikwels onseker, hul selfbeeld is swak en hulle sukkel eendag met verhoudings, hul huwelik en ouerskap.
GEE HOM VLERKE
Nog ’n belangrike aspek van ouerskap wat “goed genoeg” is, is dat jy jou kind die geleentheid gee om tot sy volle potensiaal te ontwikkel.
Dit behels elke aspek van sy funksionering, van sy fisieke en intellektuele tot sy morele en spirituele ontwikkeling.
’n Kind het ’n natuurlike behoefte aan ’n vaste basis van waar af hy sy omgewing kan ontdek.
Ouerskap wat “goed genoeg” is, sal plek maak vir ’n wye verskeidenheid stimulasiemoontlikhede. Jou betrokkenheid en ondersteuning is belangrik, selfs tot jou kind al volwasse is.
Oorversigtige ouers perk hul kinders se ontwikkeling in deur vrese. Dis beter om jou kind in beheerde omstandighede met iets nuuts of gevaarliks te laat kennis maak as om hom daarvan te weerhou, sodat hy dit later uit nuuskierigheid in elk geval toets.
Die Inheemse Amerikaners (Indiane) byvoorbeeld, laat ’n kind toe om in die rigting van die vuur te kruip sodat hy self die hitte kan voel, maar hulle hou hom fyn dop terwyl hy dit doen sodat hy nie verbrand nie. Só leer die kleintjie dat dit te warm naby die vuur is en sal hy later ook van die vuur wegbly, selfs al is sy ouers nie daar om ’n oog te hou nie.
Onthou egter dat die grense natuurlik baie streng moet wees as dit kom by lewensbedreigende sake of dinge wat ernstige beserings kan veroorsaak.
Geld kan nooit die plek van ouerliefde en aandag inneem nie.