BEENTJIES WORD GOU MOEG
My dogtertjie is vier jaar oud. Ek kom agter haar beentjies word maklik moeg. Is daar oefeninge wat ons by ons speeltyd kan inwerk om haar bene sterk te maak?
ANRO-MARI COHEN ANTWOORD:
Vierjarige kinders kan vir lang rukke aaneen aktief speel. Hulle is nou al goed toegerus met hardloop- en springvaardighede en hul hand-oog-koördinasie verbeter ook by die dag. Die groot motoriese vaardighede waaroor ’n vierjarige moet beskik, sluit in om: • Vyf sekondes lank op een been te staan; • Op een been te spring; • Drie sekondes lank op haar tone te staan; • Vorentoe te spring en oor voorwerpe te spring; • Te hardloop en van rigting te verander, of skielik te stop; • Op ’n reguit streep agteruit te loop; en • Te huppel.
Oefen hierdie mylpale as deel van speeltyd en werk beenoefeninge in sonder dat sy eens agterkom julle oefen. Maak dit lekker en interessant en wissel elke dag speletjies af.
Aangesien vierjariges al kan loop, hardloop en spring kan jy vir haar ’n hindernisbaan opstel met struikelblokke waaroor sy moet spring of waaronder sy moet deurkruip.
Bal skop is ook ’n goeie aktiwiteit wat balans en spierkrag bevorder.
Jy kan strepe met verskillende vorms en patrone op die vloer plak en haar dan op haar tone op die vorms laat loop.
Jy wil nie net haar spiere sterk maak nie, maar ook aan haar uithouvermoë werk. ’n Speletjie daarvoor is “muursit’’: Sit albei met jul rug teen die muur en jul bene teen 90 grade gebuig, en kyk wie die posisie die langste kan volhou.
Nog idees is aktiwiteite soos skêrspronge, een-beentjie staan en een-beentjie spring, syloop op ’n balanseerbord, agteruit loop, fietsie ry teen mekaar se voete, enige klimaktiwiteite en speletjies soos hinkspel.