Trek ’n streep (weer en weer en weer)
Wat om te doen as jou engeltjie weier om te eet, te bad, hare te was en in haar motorstoeltjie te sit. Of as sy haar maatjies begin byt en ‘daar onder’ vroetel ...
Peuters is interessante wesentjies. Terwyl hulle nog te klein is om logies te redeneer, is hulle slim genoeg om alles te weet van manipulasie en beheer. En dís gewoonlik waar menige ma se verdraagsaamheid en selfbeheersing tot die uiterste beproef word.
Die Amerikaner dr. Christopher Green, een van die wêreld se voorste kenners van die onder-vier-span, beskryf peuters in sy boek New Toddler Taming só: Peuters is gebou volgens ’n perfekte plan, maar met een klein tekortkoming – hulle is so besig soos ’n internasionale lughawe, maar die beheertoring het nog nie begin werk nie.
Die meeste ma’s weet gewoonlik instinktief wanneer hul peuters soos régte peuters begin optree. Wie kan dan daardie stampende voetjies of skreeuende lyfie op die grond miskyk? Om nie te praat van die soet ou babatjie wat altyd so lekker aan haar kossies gesmul het nie ... ewe skielik het die einste klein kalant ontdek dat jy ’n groot kabaal opskop as sy die muur met haar toebroodjie kan raakgooi. Of nog beter, haar hele bord kos op die vloer omkeer.
En terwyl sy onskuldig probeer uitpluis presies watter “konsert” jy volgende gaan hou, dink sy baie selfvoldaan: “Sjoe! Dit werk soos ’n bom! Kyk hoe lekker spring sy op en af!”
Ja, so onhebbelik soos maar net ’n peuter kan wees, so onskuldig en afhanklik is hulle eintlik nog van jou. Daar is geen kwaadwilligheid in hulle ou hartjies nie. Hulle onnutsighede is eintlik maar net ’n klein deeltjie van hul groot ontdekkingsreis. En natuurlik moet hulle op hul eie manier uitvind presies waar jy die streep gaan trek. En of jy daardie streep wéér en wéér en wéér gaan trek. En dan sal hulle waarskynlik nog net een keertjie probeer, onbewus daarvan dat hulle stadig maar seker besig is om jou oor die rand te stoot!
Ons het ’n paar algemene peuterdilemmas geïdentifiseer en probeer hulp en raad gee.