POSITIEWE DISSIPLINE VIR PEUTERS
Heidi deel vier kern- benaderings tot positiewe dissipline.
1. DIE RAAISPELETJIE
VOORBEELD In die middel van die nag begin die ses maande oue Emily skielik huil. Haar ouers word uit hul diep slaap wakker. Hulle weet nie heeltemal wat die oorsaak van haar huilery is nie. Is sy nat of kry sy oud? Nee. Het sy ’n wind? Nee. Dalk honger? Daar is nog ’n bietjie melk in haar bottel ... sukses!
Emily suig ’n paar minute lank aan haar bottel en word vaak. Hulle plaas haar terug in haar wiegie en sy raak aan die slaap.
Die raaispeletjie werk goed omdat babas om ’n rede – gewoonlik ’n baie logiese rede – onaanvaarbaar optree. WENK As ouers hulle tot die raaispeletjie wend, word strafmaatreëls onnodig.
2. KOM ONS ONDERHANDEL
VOORBEELD Laura, ’n nuuskierige eenjarige, het haar ma se nuwe sykouse gevind en ruk en pluk daaraan. Dis vir haar ma onaanvaarbaar, want die kouse kan geskeur word. Sy haal ou kouse uit en neem die nuwes versigtig weg. Laura ken nie die verskil tussen die twee nie en vind die tweede paar sykouse ewe plesierig. Haar behoeftes is bevredig – en haar ma s’n ook. WENK As jy een soort gedrag onaanvaarbaar vind, vervang dit met ’n aanvaarbare soort.
3. NIEVERBALE EK-BOODSKAP
Kinders wat te jonk is om taal en woorde te verstaan, sal nie deur woordelikse boodskappe beïnvloed word nie. Daarom moet die ek- boodskap in ’n nieverbale boodskap omskep word. VOORBEELD Pa stoot vir klein Tommie in die supermark en Tommie skop hom herhaaldelik op die maag en wil hom met elke skop doodlag. Pa sit vir Tommie onmiddellik op die vloer neer en sê: “Dit maak my seer en nou wil ek jou nie meer dra nie.”
Onthou, jy wil tog uiteindelik net hê dat jou kind weet hoe jy voel. ’n Geslanery, geklap, gestamp, geskree of geknyp kommunikeer onvermydelik aan die kind dat hy sleg is, dat hy verkeerd is, dat sy behoeftes nie belangrik is nie en dat hy dit verdien om gestraf te word. WENK Laat kinders weet hoe jy voel, selfs as jy nie woorde kan gebruik nie.
4. VERANDER DIE OMGEWING
Die meeste ouers weet instinktief dat ’n uiters doeltreffende manier om onaanvaarbare gedrag stop te sit, eenvoudig ’n verandering in die kind se omgewing behels. Watter ouer het nog nie gesien hoe ’n verveelde en neulende kind hom self begin besig hou met dinge wat sy belangstelling prikkel soos klei of vingerverf nie?
Soms het kinders egter presies die teenoorgestelde nodig. Hulle is byvoorbeeld net voor slaaptyd vol woema. Oorgestimuleerde kinders sal dikwels bedaar as daar vir hulle gelees of ’n storie vertel word. ’n Groot deel van die woeligheid en stres wat met slaaptyd gepaardgaan, kan vermy kan word as ’n mens ’n bewuste poging aanwend om die kind se omgewingstimulasie aansienlik te verminder.
Jy kan ook heelwat van jou peuter se onaanvaarbare (en destruktiewe) gedrag vermy deur seker te maak dat jou huis ’n kindervriendelike omgewing bied. WENK Dit maak dikwels meer sin en is meer doeltreffend om jou kind se omgewing te verander as om die kind self te verander.