5 WENKE VIR borsvoeding
My swangerskap is besig om einde se kant toe te staan. Dis een van my lewensdrome om my baba te borsvoed, dus wil ek seker maak ek kry dit sommer van die begin af reg. As jy net vyf wenke vir suksesvolle borsvoeding kan deel, wat sal jy kies?
LISANNE DU PLESSIS ANTWOORD:
Volgens ’n onlangse artikel in die hoog aangeskrewe mediese joernaal TheLancet verbeter borsvoeding die oorlewing, gesondheid en ontwikkeling van alle kinders in alle dele van die wêreld. Babas wat geborsvoed word, word beskerm teen kinderinfeksies en hulle loop ’n kleiner gevaar om oorgewig te raak en om later diabetes op te doen. Hulle word verder beskerm teen onvolmaakte posisionering van die tande wanneer die kakebene op mekaar is, en hul intelligensietellings is ook hoër. Ma’s wat borsvoed het ’n laer risiko om borskanker, eierstokkanker en diabetes tipe 2 op te doen. Swangerskappe wat kort ná mekaar volg verhoog gesondheidsrisiko’s en borsvoeding is ’n natuurlike manier om die tydperk tussen geboortes te verleng. Dit is dus ’n uitgemaakte saak dat borsvoeding die beste voedingsbesluit is en vir ma’s en babas menige voordeel inhou. Ek deel dus graag die volgende vyf wenke vir suksesvolle borsvoeding.
BESLUIT VOOR JY KRAAM dat jy gaan borsvoed. BEREI JOU EMOSIONEEL EN FISIEK SO GOED AS MOONTLIK VOOR. Jy kan dit doen deur na te lees oor borsvoeding en voorgeboorteklasse by te woon, asook deur met ervare ma’s oor die uitdagings en vreugdes te gesels. MAAK SEKER JOU BABA WORD SO GOU MOONTLIK NÁ GEBOORTE op jou bors geplaas (vel teen vel) en borsvoed jou baba binne die eerste uur ná geboorte. Praat met jou ginekoloog of vroedvrou oor hoe belangrik borsvoeding vir jou is en dat jy wil hê jou baba moet so gou moontlik ná die geboorte vel teen vel geplaas word. JY MOET GEMAKLIK WEES wanneer sy borsvoed. Maak dus seker jy sit, lê of staan gemaklik (want ma’s borsvoed mos later in enige posisie!) voor jy jou baba aan die bors sit. Posisionering en aanhegting van die baba aan die bors is uiters belangrik om seer tepels te voorkom en seker te maak jou baba suig die melk doeltreffend uit die bors. Jou baba moet op haar sy lê terwyl haar gesiggie na jou bors kyk. Kielie die bolippie, wees geduldig en wag tot jou baba haar mondjie wyd oopmaak voor jy die bors aanbied. GENIET BORSVOEDING! Dit is die allerbeste belegging wat jy in jou baba se voeding, gesondheid en sorg kan maak en voor jy jou oë uitvee is hierdie koestertyd verby. Haal dus die meeste uit jou en jou baba se borsvoedingsverhouding.