Terapie vir die alledaagse
Wat doen arbeidsterapeute alles en hoe kan hulle jou kind help?
Die veld waarin arbeidsterapeute werk strek besonder wyd – letterlik van ’n neonatale eenheid tot ’n tehuis vir bejaardes. Alle arbeidsterapeute, ongeag die veld waarin hulle werk, het egter een doel voor oë en dít is om te identifiseer met watter daaglikse take hul pasiënt sukkel en dan maniere te vind om hulle te help om daardie take makliker te voltooi.
“In die geval van babas, peuters en kleuters is dit egter nie net die kind wat jou pasiënt is nie, maar ook sy versorger,” sê Jennilyn Bester, ’n arbeidsterapeut met ’n spesiale belangstelling in pediatrie by die Pelonomi-hospitaal in Bloemfontein.
As ’n mens besoek aflê by die kliniek waar Jennilyn met hoofsaaklik babas en peuters werk, kom jy gou agter dat die ma’s of versorgers van die kleingoed ewe veel hul pasiënt is as die kinders.
Ma’s van kinders met hidrokefalie (ook bekend as ’n waterhofie, waar water in die skedel opbou) word touwys gemaak oor hoe om hul baba te help met oefeninge wat die verswakte spiere in hul lyfie sterker kan maak sodat hulle dalk later hul eie bottel kan vashou of hulself met ’n lepel kan voer.
“Dit gaan dus nie net oor die kind nie, maar ook daaroor om die ma se lewe eenvoudiger te maak,” verduidelik Jennilyn. Hulle werk onder andere met peuters met Down-sindroom, kinders wat aan wanvoeding ly en kinders met brandwonde.
Arbeidsterapie wat op peuters gerig is, fokus egter nie net op ernstige toestande nie. Gewone, gesonde peuters kan ook daarby baat vind. Volgens Marieta Visser, ’n arbeidsterapeut verbonde aan die Universiteit van die Vrystaat, kan ’n arbeidsterapeut byvoorbeeld ’n jong kind wat links- én regshandig is help om ’n dominante hand te kies, of ’n kind met ’n lae spiertonus leer om sekere daaglikse take uit te voer soos om regop sit sonder om haar nek te stut.
Albei ingrypings val onder die afdeling remediëring, een van vier oorhoofse take wat arbeidsterapeute verrig.
Arbeidsterapeute rehabiliteer ook. Dit sluit in ingrypings soos om ’n kind wat sy hand of been verloor het te help om in sy nuwe wêreld aan te pas. Arbeidsterapeute